Athletic Clubek 0-Real Madrilek 1: Jokua saririk gabe

Athletic Clubek aldapaz gora dauka Kopako kanporaketa San Mamesen Real Madrilen aurka 0-1 galdu eta gero. Joku ona eta portaera ezinobea ez dira aski izan saria eskuratzeko eta balentriaren zain geratzen da taldea Bernabeuari begira.

Etxean aldiz, ezinobea izan da ere zaleen erantzuna: 32.000 ikusle inguru hurbildu da San Mamesera Klubeko egun erdian daukagun eguraldiaren “laguntzarekin” eta amaieran hasieran bezain sutsu agurtu dute taldea, hots, txalo artean, argi eta garbi baitago jokalariek daukaten guztia ematen dutenean harmailetatik eskerronekoa baino ez da iristen.

Partidari bertso artean eman zitzaion argi berdea eta berehala Kopako izaera hartu zuen norgehiagokak. Talde biek nahi zuten gola lehenbailehen egin eta horra hor aukerak frogatzeko. Beckhamen falta jaurtiketari erantzun ona eman zion Aranzubiak laugarren minutuan eta gauza bere egin zuen Diego Lopezek Adurizek gertutik izan duen abagunean 7. minutuan. Baptistak buruz errematatu du doi-doi 18. minutuan, Gurpegik buruz gora minutu bat beranduago, Adurizen areaz kanpoko jaurtiketa bortitza kornerrera joan da 20. minutuan, 21. minutuan Robinhoren erremate gurutzatua Aranzubiak bidali du kornerrera, Etxeberriak buruz area txikian langa gainetik kornerra errematatu du buruz 32. minutuan, Diego Lopezen gorputzarekin egin du topo Julen Guerreroren jaurtiketa 35. minutuan eta Robinhok altuegi errematatu du areaz kanpotik 43. minutuan. Lehen zatia polita ikuslearentzat, grinaz eta presioz beterikoa, eta norgehiagoka zabalik bigarren zatirako.

Bide beretik joan da partida atsedenaldiaren ostean. Athletic Clubek presioa eta erasorako borondate gehiago ezarri ditu eta Real Madrilek bere jokalarien kalitatea eta normalean baino joko zuzenagoa. Guerrerok izan du lehen aukera 49. minutuan, baina Real Madril hurbildu den lehendabizikoak izugarrizko arriskua sortu du Baptistaren bitartez, Aranzubiak baloia ondo harrapatu badu ere. Ia jarraian Julen Guerrerok ezin izan du gauzatu bere hirugarren abagunea eta berehala utzi du bere tokia, Etxeberriarekin batera, Yeste eta Llorenterentzat. Zidane sartu da hortik gutxira Soldadoren ordez baina joera ez da aldatu protagonista berriekin: Yesteren falta jaurtiketa ez da gutxigatik gola izan 69. minutuan eta Llorenteren kanpora bota du 70. minutuan. Minutu horretan, tamalez, heldu da zero eta batekoa garrantzirik ez zeukan zelai erdiko jokaldian. Gutik errebotez harrapatu du Orbaizekin bilatzen zuen baloia, pase sakon bikaina egin du eta Robinhoren erdiraketa sareetara bidali du Beckhamek.

Eta hortxe lehia amaitutzat eman dela esan daiteke eta partidarekin batera ia amaitutzat eman dezakegu Kopako ibilbidea.

Fernando Amorebieta gazteak bere debuta egin du taldearekin lehia ofizialean, Intertoto Kopa jokatu bazuen ere eta Aduriz itzuli da Athletic Clubera, bere laugarren partida jokatuz.