Lehen Mailako bost euskal taldeak, Euskaraldiarekin bat

Euskal Herriak Euskaraldian murgildurik jarraitzen du, azaroaren 20tik abenduaren 4ra arte luzatuko den euskara ulertzen duten hiztunen hizkuntza ohiturak aldatzeko ariketa sozialean. Lehen edizioan egin zuten bezala, Athletic Clubek eta Athletic Club Fundazioak bat egin dute euskararen erabileraren aldeko mugimenduarekin eta horrekiko konpromisoa berretsi dute.

Euskaraldiak irauten duen bitartean gauero San Mames argitzeaz gain, “Gehiago, gehiagorekin eta gehiagotan” leloarekin (euskara gehiago hitz egitea, jende gehiagorekin eta gehiagotan), Athleticek ekimen bateratu bat bultzatu du euskara eguneroko hizkuntza duten Ligako gainerako taldeekin batera. Bere kanal ofizialetan azaroaren 10ean argitaratutako bideo baten bidez, Klubak “euskararen aldeko partidarako hamaikakoa” aurkeztu zuen San Mamesen, Euskaraldia milurteko hizkuntzaren aldeko partida gisa irudikatuz. Bideo horretan Jose Angel Iribarrek eta Gaizka Garitanok hartu zuten parte, Athleitcen barruan gure hizkuntzaren bultzatzaile handienetako bik, eta horiekin batera Eli Ibarra bezalako ikonoa eta Ane Azkona, Asier Villalibre eta Josu Genuine taldeko futbolariak nabarmendu ziren. Horiek denak erakundearen funtzionamendurako ezinbestekoak diren hainbat sailetako langileekin batera.

Bideoaren azken zatian, Athleticek Sadarren euskararen alde jokatuko den partidarako bere hamaikakoa aurkeztera animatu zuen Osasuna, eta horrela, egunerokotasunean euskara erabiltzen duten Lehen Mailako bost klubek parte hartu duten kate bati hasiera eman zion.