Bilbao Athleticen porrota Leonen

Bilbao Athleticen lehen porrota denboraldi honetan. Imanol de la Sotaren mutilek porrota jaso dute Cultural y Deportiva Leonesaren aurka, etxeko taldeak markagailuari buelta eman eta gero.

Lehongo taldea gehiago izan zen hasieran. Obolskiiren burukada bati esker, etxekoek langara bidali zuten baloia eta Bilbao Athleticek ikusi zuen nola sortu zioten arriskua zenbait jokaldietan. Hala ere, Bilbao Athleticek etekina atera zion 32. minutuan Sotresek Serranori egindako penaltiari. Artolak ez zuen barkatu hamaika metroetatik.

Aldageletatik igaro ostean, Ramon Gonzalezen taldea golaren bila atera zen eta saria izan zuen. 52. minutuan, Amelibiak berdinketa lortu zuen, buruz, geldikako jokaldi batean, eta handik gutxira, 63.ean, Nahuelek kontraeraso batean zigortu zuen De la Sotaren taldea. Bilbao Athletic erasoan hazten saiatu zen eta azken txanpan lortu zuen, Goti eta Ewan, partidako azken jokaldian, izan zituzten aukera argienak. Lehoikumeak punturik gabe itzuliko dira Reino de Leon futbol zelaitik.