Athletic Club - Sevilla FC

Athleticek porrota jaso du Sevillaren aurka San Mamesen (1-2). Hortaz, andaluziarrek Bilbon zeramaten ondoz ondoko bederatzi porroteko boladarekin amaitu dute eta zuri-gorrien aukerak Europan jokatzeko zailago jarri dituzte. Banegak eta Munirrek buelta eman zioten Capak jarritako 1-0ekoari.

Sevilla agindu nahian zelairatu zen Reguilonen hegaletik sakonduz, baina Athleticek lekua hartu zuen pixkanaka. Williamsek abisatu zuen gora botatako bolea batez, baina berehala erantzun zuen Ocamposek Susoren pase batean.

Yuriren lesioak Balenziagari eman zion lekua. eta lehoiek, ikaratu beharrean, saria lortu zuten 26. minutuan. Sancetek hondoko marran denbora izan zuen Vesgari area ertzean ikusteko, eta Capa, erne, bigarren zutoinean agertu zen eskuinarekin maisutasunez gurutzatzeko.

Athleticek 2-0ekoa egin zezakeen luzapenean. Vesgaren alboko sake luze bat Muniainen oinetara heldu zen, eta aukera aparta izan arren kanpora bidali zuen. Bigarren zati osoa geratzen zen. Eta Cordobak korner baten ondorioz izandako abagunearekin lehoiek hasiera ona izan ondoren, Sevilla partida kontrolatzen joan zen Banegari esker. Simonek denbora batez eutsi zion taldeari Ocamposi geldiketa bikaina eginda, baina Banega argentinarrak berak bakarrik eman zion buelta neurketari bost minututan.

Lehenik eta behin, maisutasunez botatako zuzeneko falta batekin, eta gero Dani Garciak Munirri egindako falta baten ondorioz, Bartzelonaren jokalari ohiaren buruan urrezko baloia jarriz. Kolpe handiegia izan zen Athleticentzat, Championsen sartzeko lehian dagoen aurkari bikain baten aurrean. Hala ere, Muniain berdinketa lortzeko zorian izan zen 85. minutuan, baina Bonok baloia urrundu zuen, eta Munirrek Iñigo Martinezi egindako ustezko penaltia ez zen BEL-en berrikusi.