Athletic Club - FC Barcelona

Athleticek 2-3 galdu du Bartzelonaren aurka Marcelino Garcia Toralen estreinaldi zuri-gorrian. Ronald Koemanen jokalariak nagusi izan dira Pedri eta Messiren eskutik. Amaierara arte saiatu da talde zuri-gorria, Muniainek 90. minutuan behin betiko markagailua jarri duenean, baina ez zen astirik izan berdinketaren bila joateko.

Gauzak ezin hobeto jarri ziren Athleticentzat hasieratik, Raul Garciaren eta Williamsen arteko kontraeraso bikain batean hirugarren minutuan, Iñakik maisuki baloia sareratu ondoren. Lehoiek 2-0ekoa egiteko aukera izan zuten, Muniain eta Yuriren arteko beste kontraeraso distiratsu batean, baina hegalekoaren jaurtiketa kanpora joan zen gutxigatik. Zazpigarren minutuan, Aitor Gandiaga auto-istripuan hildako Baskoniako jokalari ohiari omenaldia egin zioten.

Barçak estualdia pasa eta berehala Simonen atea inguratzen hasi zen, baina Dembeleren jaurtiketa ondo urrundu zuen. Banakoa 14. minutuan iritsi zen: Messiren erdiraketa batek De Jongek luzatu eta Pedrik buruz baloia sarera bidali zuen. Yuriren muskulu-lesioak min handia egin zion taldeari 30. minutuan, eta handik gutxira Messiren bi goletatik lehena iritsi zen Pedrik orpo ikusgarri batez baloia utzi eta gero.

Atsedenaldiaren ostean, Athleticek pare bat jokaldi egin zituen, horietako bat Raul Garciarena, baina bisitariek aukerak pilatzen jarraitu zuten Messiren oinetan, bi aldiz zutoinean emanez eta baliogabetutako gol bat barne. 61. minutuan iritsi zen Leoren 1-3koa, eta lehoiek ezin izan zuten 90. minutura arte beste gol bat egin Muniainen eskutik Berenguerren pase on baten ondoren, nafarrak sartzen duen denboraldiko laugarrena, alegia.