Levante UD - Athletic Club

Athletic Clubek bere nagusitasuna erakutsi zuen Levanteren aurka. Jokoa kontrolatu zuen eta bereak izan ziren partidako arrisku jokaldirik onenak, baina berdinketan amaitu zen. Puntu bat bakoitzarentzat. Lehoiek aukera gehiago izan zituzten, eta golaren bila jarraitu zuten, baina kontrako penaltia jasan zuten lehen zatian. Zuri-gorrien erantzuna ere antzekoa izan zen, Raul Garciaren eskutik. Athletic bigarrena bilatzen saiatu zen, baina azken errematean ez zuen asmatu emaitza iraultzeko.

Athleticen aldeko aukerak pilatu ziren partida hasieran, Raul Garciaren eta Muniainen aukera bikoitzarekin, oso argia, Alex Berenguerren erdiratzean. Hala ere, Aitor Fernandezek, bere lana oso ondo eginez, bi aurrelari zuri-gorrien saiakera ekiditzea lortu zuen.

Jokoaren nagusitasuna bisitariena zen, baina Levanteren lehen arrisku jokaldian De Frutosek Unai Vencedorri baloia lapurtu eta arean egindako barneraldian, Unai Nuñezek baloia mozteko ahaleginean penaltia egin zion epailearen ustez. Rogerrek Unai Simonen ezkerrera jaurti zuen, eta Levantek aurrea hartu zuen markagailuan ordura arte Athleticek arrisku handiagoa sortu zuen arren. Atsedenaldira heldu baino lehen, lehoiek beste aukera pare bat izan zuten Williams eta Berenguerren eskutik.

Athletic erasoko jokoari jarraipena emateko prest zelairatu zen bigarren zatian, eta Williamsek hegaleko barneraldi batean baloia Berenguerri eman zion, baina Vukcevicek area barruan aurrelari zuri-gorria lurrera bota zuen. Lehoien aldeko penaltian Raul Garciak ez zuen barkatu.

Athleticen lerroetan izandako aldaketek bigarren golaren bila joateko bultzatu zuten: Capak hegaletik egindako erdiraketak area osoa zeharkatu zuen baina Unai Nuñezek ez zuen errematatzerik izan. Villalibrek ere urrutiko jaurtiketa egin zuen, baina baloia gora joan zen.

Partida bukatu ondoren, eta VORetik abisua jaso ondoren, epaileak txartel gorria erakutsi zion Iñigo Martinezi partidan zehar Sergio Leonekin izandako liskar baten ondorioz.

Bi taldeen arteko bigarren neurketa berdinketan bukatu zen, datorren ostegunean jokatuko den Kopako finalerdietako partida erabakigarriaren aurretik.