Partida aurrekoa: Atletico de Madrid-Athletic Club (LaLiga 33. J)

Atletico de Madridek eta Athletic Clubek laugarren aldiz neurtuko dituzte indarrak denboraldi honetan. Biek ala biek lehia estua dute Txapeldunen Ligarako txartela ematen duen laugarren postua lortzeko. Hori hizpide delarik, bi taldeen puntuen arteko aldea eta historikoki biek duten lehiak neurketa oso erakargarria izatera behartzen dute. Lehoiek, hiru puntuak lortuz gero, talde koltxoneroa berdinduko lukete puntutan eta goal averageari esker aurretik jarriko lirateke. Aitzitik, partida galduz gero, Txapeldunen Liga sei puntura geratuko litzateke.

Ernesto Valverdek zuzentzen duen taldeak balentria berri bat gauzatzea bilatuko du Metropolitanon, eta denboraldi honetan Atleticoren aurka jokatutako hiru partiden emaitza errepikatzen saiatuko da.

Deialdia

Teknikari zuri-gorriak 23 futbolari deitu ditu talde madrildarraren aurka neurtzeko. De Marcosek, txartel horiek behartuta zigortuta, eta Yurik, min hartuta, ezin izango dute Madrilera bidaiatu. Horien ordez, Hugo Rinconek Athletic Cluben zerrenda osatuko du.

Valverde

Errepasatu hemen Ernesto Valverderen prentsaurrekoa LaLiga 2023/24 denboraldiko 33. jardunaldiari dagokion Atletico de Madrid-Athletic Club partidaren atarian.

Aurkaria

1903ko apirilaren 26an Madrilgo Athletic Club sortu zen, euskal ikasle batzuek bultzatuta, talde berri bat sortzeko asmoz. Atletico de Madriden elastiko zuri-gorriak 1911ko urtarrilaren 22an hasi ziren erabiltzen, eta, ondorioz, Koltxoneroak izena jarri zioten, uniformea eta garai hartako koltxoien zorroak antzekoak zirelako. 1936an, Gerra Zibila iritsi zenean, lehiaketa ofizialak bertan behera geratu ziren, eta, gatazka amaitu zenean, Abiazio Nazionalarekin, Aireko Armadaren kirol-atalarekin, bat egin zuen klubak, Athletic Aviacion de Madrid izen berriaren pean. 1947an, gaur egun ezagutzen dugun moduan deitu zitzaion, Atletico de Madrid.

Espainiako klubik sarituenetako bat da, estatuko eta nazioarteko tituluen artean hogeita hamarretik gora dituena. LaLigan 85 denboraldi egin ditu, eta 1929ko inaugurazio denboraldian parte hartu zuten hamar klubetako bat da. Ligako hamaika titulurekin, txapelketako liga gehien lortu dituen hirugarren kluba da, eta txapelketako sailkapen historikoko hirugarren postuan dago. Kopako lehiaketan beste hamar titulu lortu ditu, eta finalista izan da beste bederatzi ediziotan. Aipatutako hogeita bat tituluez gain, Altetico de Madridek Espainiako Superkopako bi titulu irabazi ditu, lehiaketa honetako aurreko beste hiru titulurekin batera. Espainiako txapelketetatik kanpo, Europako zortzi talde sarituenetako bat da UEFA txapelketetan: hamasei aldiz jokatu du Txapeldunen Liga eta hirutan azpitxapeldun izan da. Europako Errekopako bederatzi ediziotan parte hartu du; horietatik titulu bat erdietsi du eta birritan azpitxapeldun izan da. Gainera, hogeita lau aldiz jokatu du Europa Leaguea eta hiru titulu lortzeko gai izan da. Azkenik, Europako Superkopako hiru garaikur lortu ditu eta 1974an Copa Intercontinentaleko txapeldun izan zen.

Une honetan, Diego Pablo "Cholo" Simeoneren taldea laugarren postuan dago sailkapenean, Athleticek baino hiru puntu gehiagorekin. Ez da momenturik onenean iritsiko lehiara; izan ere, Borussia Dortmundek Txapeldunen Ligako final-laurdenetan kanporatzeaz gain, talde madrildarrak bi garaipen (Villarreal CF eta Girona FC) eta hiru porrot (Cadiz CF, FC Barcelona eta Deportivo Alaves) erdietsi ditu azken bost partidetan.

Estatistikak

1928/29 denboraldian LaLigan lehen aldiz jokatu zutenetik, Atletico Madridek eta Athleticek 173 partida jokatu dituzte maila gorenean, eta talde madrildarrak aldeko balantzea du: 64 garaipen, 31 berdinketa eta 78 porrot.

Madrilen jokatutako 86 partidei dagokienez, Athleticek 19 garaipen, 15 berdinketa eta 52 porrot pilatu ditu.
 

Bi taldeek Cívitas Metropolitano zelaian jokatutako azken bost neurketetan, Athleticek lau porrot eta berdinketa bat lortu du.

Kontsultatu Atletico de Madridek eta Athletic Clubek jokaturako neurketen estatistika guztiak.

Ordutegiak eta Atletico de Madrid - Athletic Club partida non ikusi

LaLiga EA Sportseko 33. jardunaldiari dagokion Atletico de Madrid-Athletic Club norgehiagoka, apirilaren 27an, larunbatean, 21:00etan, Cívitas Metropolitano zelaian jokatuko da.

DAZN katearen bidez jarraitu ahal izango da. Munduko beste edozein tokitatik ikusi nahiko bazenu, hemen duzu LaLiga partida eskaintzen duten telebista operadoreen zerrenda luzea.