“Bartzelonan irabaztea gustatuko litzaiguke, horretara goaz”

Marcelino Garcia Toralek agerraldia egin du Lezamako prentsa aretoan Bartzelonaren aurka Camp noun jokatu baino egun bat lehenago (igandea, 21:00etan). Zuri-gorrien entrenatzaileak Bartzelonari egindako bisitaren zailtasunaz jabetuta, “joko eta emaitza aldetik oso dinamika onean” ikusten du Athletic, eta “baikortasunez, ausardiaz eta anbizioz” ikusten du taldea Bartzelona mendean hartzeko.

“Duela gutxi aritu gara euren aurka. Lehenengoan, San Mamesen, nagusi izan ziren eta horren arrazoia badakigu. Superkopako finalean, gu izan ginen nagusi eta merezita irabazi genuen. Asko hobetu dugu baloirik gabe, presio guneetan asmatuz eta aurkariaren erasoan jokoa neutralizatuz. Arrisku egoera gutxi sortu zizkiguten eta bihar defentsan eraginkortasuna mantentzen saiatuko gara”, azaldu du Marcelinok.

Entrenatzaile zuri-gorriak taldearen eraginkortasuna ere azpimarratu du erasoaren alorrean: “Oso zenbaki onak ditugu golari begira. Gaur egungo Athleticek gainditu egiten du nik buruan nuena hona iritsi ginenean. Ez dakit zenbat aldiz errepikatuko dugun Getaferen aurkako bigarren zatian eskaini genuen ikuskizuna, adibidez, baina egunero lan egiten dugu hobeak izateko. Hobetu ezin dugula pentsatzen dugun egunean okerrera egiten hasiko gara”.

Laligan Camp Noura egindako azken bisitetan Athleticek emaitza positiborik lortu ez duela jakitun da Marcelino: “Jokalariek erakutsi didate ez direla inor baino gutxiago sentitzen, eta euren lanarekin eta erabakiarekin edonori irabaz diezaioketela. Bihar Bartzelonan irabaztea gustatuko litzaiguke, eta horretara goaz”.