Elizegi: “Athletic txapeldun batekin amets egiten dugu”

Aitor Elizegi Athleticeko presidenteak agerraldia egin du gaur arratsaldean San Mameseko Jose Iragorri prentsa aretoan, atzoko Ezohiko Batzar Nagusia aztertzeko. Elizegik bozkatzeko aurkeztu diren bi atal ekonomikoak onartu izana eta kudeaketa atzera bota izana azpimarratu du: “Argi geratu da gure planteamendu ekonomikoa gure bazkideen eta hirugarren erakundeen aurrean onartuta dagoela. Bazkideen konfiantza hori sentitu dugu. Denboraldi honetako aurrekontuan, benetako betebehar asko izan ditugu dagoeneko: zaleak zelaian sartu ezin izana, urtarrileko jokalarien merkatua, kontratuen berritzeak… Hurrengo hilabeteetan itxaropen handia dugu. Kudeaketari dagokionez, argi dago ez dugula gure ahalegina helarazten jakin, eta hori argi utzi du Batzarrak”.

Athleticeko presidenteak azpimarratu duenez, ekitaldi ekonomikoa eta kudeaketa banatzen jarraituko dute: “Ibaiganen gauden bitartean horrela izango da. Zuzendaritza batzorde baten proiektuak lantzeko orduan, urrats ona dela uste dugu hiru puntuak bereiztea, eta horrek aberastu egiten du eztabaida”.

Elizegik klubaren kudeaketaren hainbat puntu azpimarratu ditu: “Athletic txapeldun batekin amets egiten dugu. Athletic bakarra eta batua nahi dugu. San Mameseko harmailen berrantolaketak estadio zaharrari buruz ditugun oroitzapenak gogoratzeko balioko digu. Eta etorkizuneko Athletic bat nahi dugu: parte hartu daitekeena, gardena, eta Batzarra etxean, San Mamesen edota telematikoki antolatu dezakeena… Batzordea lan handia egiten ari da erreforman. Orain pentsatzen dugu egoera lasai dagoela eztabaida horretarako, eta hilabete hauek ditugula aurretik, atzo sentitu genuen konfiantzazko botoaren ostean, baita aipatu ditugun kritika konstruktiboen ostean ere”.

COVID-19ren ondorioengatik bazkideei planteatuko zaien aparteko kuotari dagokionez, Elizegik azken egunetan klubak adierazitakoa azpimarratu du: “Gure Batzarrarekin partekatu, eztabaidatu eta adostu nahi dugu zer esan nahi duen Covid kuota horrek. Hurrengo Ohiko Batzarrean guk proposatzen ditugun ideiak aurkeztuko ditugu eta Athleticeko bazkide taldeak erantzungo du”.

Joan den astean soldatak jaisteko akordioa adostu ostean, gizonezkoen lehen taldeko jokalari guztien ahalegina eskertu nahi izan du Athleticeko agintari nagusiak: “Talde honek bi titulu irabazi ditu aurten: Superkopa eta elkartasuna”.