Posta bidez botoa emateko araudia

Botoa postaz eman ahal izango da, aldez aurretik Klubaren bulegoan eskatuta, honako baldintza hauekin:

• A) Bazkideak, hauteskunde-prozedura aldarrikatzen den egunetik aurrera, Erroldan inskribatuta dagoela egiaztatzen duen ziurtagiria eskatuko du.
• B) Eskaera pertsonalki eta aurrez aurre aurkeztu beharko da Klubak horretarako prestatu dituen bulegoetan: Klubaren Bazkidearentzako Arreta Bulegoa, Bilboko San Mames estadioan, 20. atearen ondoan. Eskatzaileak bere nortasuna egiaztatu beharko du jatorrizko Nortasun Agiri Nazionala edo, hala badagokio, indarrean dagoen pasaportea aurkeztuta. Bi inskripzio-ziurtagiri emango dira: bata Klubaren esku geratuko da, eta bestea bazkideari emango zaio. Ziurtagiri hori aurrez aurre eskatu ahal izango da ekainaren 17ra arte, egun hori barne.
• C) Bazkidea ezin bada Klubaren Bazkidearentzako Arreta Bulegora joan, inskripzio-ziurtagiriaren eskaera bidali ahal izango du, eta bertan bazkide eskatzailearen sinadura agertu beharko da, notarioak legeztatuta. Eskabide-eredua Klubaren webgunetik deskargatu ahal izango da, ‘Bakideen Txokoa’ atalean, edo Bazkidearentzako Arreta Bulegoan jasota. Behar bezala bete beharko da, bazkidearen sinaduraren notario-legitimazioa barne. Jatorrizko inprimakia Klubaren bulegoetara bidali beharko da, posta ziurtatu bidez edo eskuz emana, honako helbide honetan:IBAIGANE JAUREGIA
  ATHLETIC CLUB
  MAZARREDO ZUMARKALEA 23
  48009 BILBAO – BIZKAIA

   

  C paragrafoan ezarritako prozeduraren bidez (sinadura legitimatua duen gutun baten bidez) bidalitako eskaera-inprimakia ekainaren 10eko 18:30ak baino lehen jaso beharko da Klubean. Egun horretatik aurrera jasotzen diren eskabideei ez zaie erantzunik emango.

Eskaera zuzena bada, inskripzio-ziurtagiria emango da, eta ziurtagiri hori adierazitako helbidera bidaliko zaio bazkideari, botoa emateko beharrezkoa den dokumentazioarekin batera.

Eskabidea onartu ondoren, Hauteskunde-Batzordeak inskripzioa egiaztatuko du eta Erroldan dagokion oharra idatziko du, hauteskunde-egunean botoa aurrez aurre eman ezin izateko.

Posta bidezko botoa eskatzeak hauteskunde-egunean botoa aurrez aurre emateko ezintasuna ekarriko du, eta eskatzaileak berariaz onartzen du hori, eskaera-dokumentua sinatuz.

Aldarrikatutako hautagai-zerrendak prest daudenean, Klubak hauteskundeetako boto-paperak eta gutun-azalak bidaliko ditu bazkideak adierazitako helbidera.

Bazkideak boto-txartel ofiziala aukeratu ondoren, gutun-azal txikian sartuko du eta itxi egingo du. Hori guztia gutun-azal handian sartuko du, baita indarrean dagoen NANaren fotokopia eta Klubak emandako inskripzio-ziurtagiria ere, bertan boto-emailearen sinadura dagoela. Gutun-azal hau posta ziurtatu bidez bidali beharko du Klubaren bulegora – Mazarredo zumarkalea 23, 48009 Bilbao –, Hauteskunde-Batzordearentzat, bidaltzailea adieraziz, eta 2022ko ekainaren 24ko 20:00ak baino lehen jaso beharko da. Baldintza horiek betetzen ez badira, botoa baliogabea izango da.

Gutun-azal guztiek Hauteskunde-Batzordearen esku egon beharko dute bozketen eguneko 20:00ak baino lehen, Hauteskunde-Batzordeak gutun-azal horiek dagokion Hauteskunde-Mahaira bidal ditzan. Gutun-azal horiek Hauteskunde-Mahaiak zabalduko ditu bozketa amaitu ondoren, eta, legezkotasuna egiaztatu ondoren, botoa duen gutun-azal itxia hautestontzian sartuko da.

HAUTESKUNDE-BATZORDEA

2022ko maiatzaren 16a