"Lehian gaude eta ez dago ezer erabakita"

Ernesto Valverde Athletic Clubeko entrenatzaileak bere iritziak eman ditu bihar, 18:30etik aurrera, Vilarreal CF-ren aurka Estadio de la Ceramican jokatu baino lehen. Bertan, Europako txapelketetarako postuak lortzeko borrokan jarraituko dute: "Berehalakoaz arduratu behar gara, partida bakoitza irabazteaz, eta gainerakoak ikusiko ditugu. Bost neurketa geratzen dira, lehian jarraitzen dugu eta ez dago ezer erabakita. Hasi ginenean nire ideia azken jardunaldietara Europarako sailkapena jokoan izatea zen. Orain, neurketa guztiak erabakigarriak dira eta borrokatu egin behar ditugu. Tentsio eta premia uneak lehen egunetik ditugu, baina norgehiagoka gogorrak datozenean aurkariak mendean har ditzakegula gogo guztiekin sinetsi behar dugu.".

Biharko partidari dagokionez,teknikari zuri-gorriak aitortu du elkar ondo ezagutzen duten bi taldek neurtuko dituztela indarrak: "Partida klasikoa da. Joko-profil desberdinak ditugu, baina ondo ezagutzen gara. Kalitate tekniko handia eta talentu eta abiadura handiko jokalariak ditu Villarrealek. Guk erritmoa daukagu, agian haiek jokoaren une jakin batzuetan duten lasaitasun apur bat falta zaigu. Hala ere, haiek ere guk ditugun gauzetako batzuk ere izan nahiko lituzkete. Denboraldi bikaina egiten ari dira eta beherakada txikiren bat izan duten arren, ondo gainditu dute".