"Aurkari zuzen baten aurka lehiatuko gara"
"Aurkari zuzen baten aurka lehiatuko gara"
David Aznarrek ohartarazi du bihar Athletic Cluben antzeko ezaugarriak dituen aurkari zuzena den Valencia CF taldearen trantsizio azkarrei erne egon beharko direla
David Aznar hedabideen aurrean agertu da espedizioa arratsaldean Valencia CF taldearen aurka jokatzera irten aurretik. Bihar, larunbata, 20:30etik aurrera (Gol Play), 9. jardunaldia jokatuko da Antonio Puchades futbol-zelaian, sailkapenearen erdialdean dauden bi talderen artean. Kopan etxetik kanpo irabazi eta lehen garaipena Lezamatik urrun lortu ondoren, entrenatzaileak honako hau esan du: "Arantzatxo hori kendu dugu eta arreta jarriko dugu guretzat beste finala den neurketa honetan. Irabazi behar dugu, ez bakarrik etxetik kanpo berresteagatik, baizik eta puntuak lor ditzakegula sentitzeagatik. Aurreko neurketetan gertu egon gara, baina aurrean ez asmatzeak asko zigortu gaitu. Gol egoera asko sortzeko bidetik jarraitu behar dugu".
Aurkariari dagokionez, Aznarrek proiektu gaztea dela aitortzen du, baina esperientzia duena ere: "Arerio zuzena da, gure antzekoa. Kontuz ibili behar dugu trantsizio azkarrekin eta adi egon beharko dugu baloia galtzen dugunean", ohartarazi du entrenatzaile zuri-gorriak Nahikari Garciak jokatuko ez duen partidaren atarian: "Gutxi geratzen zaio, zorionez ez baita ezer larria izan. Prest dauden guztiekin bidaiatzeko moduan gaude".
Lehoiek garrantzi handiko partida jokatuko dute hurrengo asteetan taldearen etorkizunari begira. Aznarrek kontuan hartu beharreko faktoreetako bat azpimarratu du: "Irabazteko gakoa, Granadan bezala, lehen gola sartzea da. Lasaitasuna ematen digu. Taldeak, bere gaztetasunagatik, agian partidan alde joateko beharra du. Horrela izan ez denean kosta egin zaigu. Normala da plantilla hain gaztearekin, eta hobetu egin behar dugu".
Madrid CFF, Kopako final-zortzirenetako aurkaria
Athletic Clubeko entrenatzailea, gainera, Erreginaren Kopako final-zortzirenetako aurkaria den Madrid CFF taldeaz mintzatu da, urtarrilaren 14an edo 15ean Lezamara etorriko dena: "Bi egun lehenago jokatu izanaren oztoporik gabe aurre egiteko gogo handia dugu, asteburuan gertatu zitzaigun bezala. Txapelketako talderik onenetakoa da. Uste dut kanporaketa gainditu ahal izango dugula. Aurkari zaila da, baina ziur gaude eta aurrera egiteko ilusioarekin gaude".