"Jokalariek dena emango dute"

48 ordu falta dira (igandea, 17:00etan) Athletic Clubek Madrid CFF San Mamesen hartzeko, Erreginaren Kopako final-zortzirenetako kanporaketan. Norgehiagoka, hil ala biziko txapelketan, zirraragarria izango da ziur. Ilusio handiko partida.

Neurketa "garrantzitsuena eta politena" heldu dela uste du Aznarrek. Pizgarri asko dituen bat, hitzordua xarma berezidun norgehiagoka: "Eszenatokia oso berezia da, bizi dugun uneagatik eta lehiagatik. Kopak ilusio handia sortzen digu eta zaleei poza ematea espero dugu. Animatzera etorriko den jende asko espero dugu eta kanporaketa gainditu nahi dugu".

Madrid CFF, zuri-gorrien aurkaria, Liga F-n talde handiekin Europako postuengatik borrokatzen ari den taldeetako bat da: "Partida zaila dugu zain. Ligako partida dugu erreferentzia, baina orduan Granadan Kopa jokatzetik gentozen, minutu gehiago pilatuta. Orain guztiz bestelako testuinguru batean gaude. Taldea landuagoa dator, aste osoa izan du prestatzeko eta denboraldiko unerik onenean dago".

“San Mamesen jokatzea, pizgarria benetan"

Entrenatzaile zuri-gorriak badaki zer den San Mamesen jokatzea. 2020ko otsailean egin zuen, CD Taconen gidaritzan, baita Kopan ere: "Publikoak oso partida zaila bihurtzen du kanpoko taldearentzat. Orain, etxeko aulkian bizi ahal izateko zortea dut. Lezamako beroa hamar aldiz jasotzeko aukera izango dugu. Ziur nago jokalariek dena emango dutela, galtzen duen taldea kanpoan geratuko baita".

Katedrala bezalako estadio handi batean jokatzeak zer esan nahi duen buruz, teknikariak argi dauka: "San Mamesen jokatzea pizgarri galanta da. Jendeak pentsa dezake presio handiagoa dugula jende gehiago dagoelako, baina ez da horrela. Nahiago nuke igandero San Mamesen jokatu ahal izango bagenu. Zorionekoak gara bertan jokatu ahal izateagatik, eta publikoak behar adina energia emango digu luzea izango den partidarako. Guretzat motibatzeko beste pizgarri bat da, eta kamiseta hau defendatzeko ardura bat ".

Azkenik, David Aznarrek badaki datozen orduetan zale zuri-gorriak ilusioz beteriko bi jardunalditan murgilduko direla, lehenik gizonezkoen derbiarekin eta igandean, emakumezkoen Kopako kanporaketarekin: "Zaleentzat poztasun handiko asteburua izatea espero dut", adierazi du.