Maria Gstöttner, USV Neulengbach taldekoa, One Club Woman 2024

Maria “Mary” Gstöttner (St. Pölten-Land, Austria, 1984) dugu 2024ko One Club Woman berria. Sari honen bidez, Athletic Clubek goleatzaile austriarrak USV Neulengbach-en egindako ibilbide bikaina aitortzen du; alegia, Austriako ÖFB Frauen-Bundesligako lehen mailako talderik ospetsuenean egindako ibilbidea. Hala, Maria Gstöttner One Club Woman Award sarien irabazleen zerrendan sartuko da, honakoekin batera: Malin Moström, Umeå I.K., Suedia (OCW 2019); Pia Wunderlich, 1.FFC Frankfurt, Alemania (OCW 2020); Jennifer Zietz, 1. FCC Turbine, Alemania (OCW 2022) eta Mati Martínez, Fundación Albacete, Espainia (OCW 2023).

Maria Gstöttnerek 19. jardunaldiko Athletic Club - Real Madrid partidaren hasieran jasoko du One Club Woman 2024 saria, Katedraleko zaleen aurrean. Partida abenduaren 4aren bueltan jokatuko da. Ordutegia ez dago oraindik erabakita. Jardunaldi berean, Athletic Clubek One Club Man 2024 saria emango dio Giuseppe Bergomiri.

USV Neulengbach taldeko goleatzaile handia

Gstöttner 1998an hasi zen USV Neulengbach-eko beheko taldeetan, artean 14 urte zituela. Denboraldi horretan egin zuen debuta lehenengo taldearekin, eta 24 urtez egon zen talde berean, 38 urterekin erretiroa hartu zuen arte, 2022ko azaroaren 5ean. Urte horietan, ÖFB Frauen-Bundesligako jokalaririk garrantzitsuenetarikoa izan zen, bai eta emakumezkoen futboleko aitzindari eta bultzatzaile handienetakoa ere, bere hirian zein herrialdean.

ÖFB Frauen-Bundesligako historian goleatzailerik handiena da Gstöttner, USV Neulengbachekin Austriako lehen mailako 465 partidatan 393 gol sartu ondoren. XXI. mendeko lehen hamarkadan, Gstöttnerek bere hiriko taldea urrezko arora gidatu zuen 12 liga jarraian irabaziz (lehenengoa, 2003an), eta 10 Kopa ere eskuratuz. Era berean, Würmlako (Neulengbach eta St. Pölten arteko herria, ipar-ekialdeko Austria-Beherean) goleatzailea sei aldiz izan zen ÖFB Frauen-Bundesligako goleatzaile nagusia (2001etik 2005era eta 2013an).

Halaber, Maria Gstöttnerek 35 alditan jantzi zuen Austriako elastiko nazionala, eta 2018an Bruno sari entzutetsua jaso zuen, urteko jokalaririk onenari ematen zaiona.

Athleticen Europako estreinaldia UEFA Women's Champions Leaguen, Gstöttneren taldearen aurka

Maria Gstöttnerrek USV Neulengbach taldearekin, Europako ibilbidean ere paper esanguratsua izan zuen. 44 partidatan 26 gol sartu zituen eta, 2003/04 denboraldian, txapelketako goleatzaile nagusia izan zen (taldeko fasea baino lehen jokatzen den aurreko fasea barne), 11 gol sartuta. 2003/04 denboraldian, gainera, Austriako txapeldunak jokatu beharreko sailkapen fasea gainditu eta gero, USV Neulengbach eta Athletic Club talde berean egon ziren. Athletic Cluben UEFA Women's Championseko lehen agerraldia zen, 2003ko liga irabazi ondoren eskuratutako txartela. Gauzak horrela, lehoien Europako lehen partida USV Neulengbach-en kontra izan zen, gerora pitxitxia izango zen Mary Gstöttnerren taldearen aurka, hain zuzen ere. Athleticek 2 – 0 irabazi zuen, nahiz eta lehenengo zatian austriarrek aukerarik onenak izan zituzten.

Hala ere, final laurdenetara igarotzeko euskaldunak eta austriarrak zeuden talde hartan, FFC Frankfurt izan zen kanporaketa gainditu zuena. Talde horretan, hain zuzen, gure bigarren One Club Woman aurkitzen zen, Pia Wunderlich. Talde alemaniarrak finala jokatu zuen urte hartan, baina UEFA Women's Champions League 2003/04 txapelketako (2009a arte UEFA Women´s Cups deitua) talde irabazlearen aurka galdu zuen. Umea IK talde suediarraren aurka, hain justu. Kasualitateak kasualitate, talde hori ere beste One Club Woman batek gidatzen zuen: Malin Moström. Bera izan zen Athletic Clubek esleitzen duen sari entzutetsuena irabazi zuen lehen emakumezkoa.

Leialtasuna eta aitorpena

Maria Gstöttnerren agurrean 6.000 pertsona inguru batu ziren USV Neulengbach taldearen zelaian, eta partida SKN St. Pölten taldearen aurka jokatu zen, herriko aurkari nagusiaren aurka. Egun ahaztezina izan zen Maryrentzat, ingurukoen maitasuna eta aitorpena jaso baitzuen klubari beti leial izan zitzaiolako.

Duda izpirik gabe, abenduaren hasieran, LaLigako klasiko handi horren aurretik (Athletic Club – Real Madrid), María Gstöttnerrek txalo zaparrada berri bat jasoko du, kasu honetan, Katedralean.