Marta Unzuek Athletic Clubeko bere ibilbidea amaitu du

Marta Unzuek, F Ligako jokalari ikonikoetako batek, ez du Athletic Cluben jarraituko datorren denboraldian, zazpi urtetan 120 partida lehoi gisa jokatu ondoren. Berriozarreko erdilaria elitean partida gehien jokatu dituen futbolarien top 5ean (468) dago, Athleticera iritsi aurretik FC Bartzelonan ibilbide oparoa egin baitzuen. Orain, lesio larri baten ondorioz azken bi urteetan jokatu ezinean ibili ondoren, Lezamarekin duen lotura bukatu du. 

Unzue 2018-2019 denboraldian iritsi zen Athleticera, FC Bartzelonak bi denboralditarako utzi ondoren. Kataluniako erakundearekin zuen kontratu-lotura amaitu eta lehoiekin 2022ko ekainera arte sinatu zuen. Uda hartan beste denboraldi batez luzatu zuen kontratua. Hala ere, 2023ko maiatzaren 13an lesio larria izan zuen eskuin belaunean ligako azken partidan, kasualitatez Bartzelona bere talde ohiaren aurka. Lesio horrek zelaietatik kanpo eduki du orain arte, eta hiru aldiz igaro behar izan du ebakuntza-gelatik.

Bere hierarkiak, zelaian zein aldagelan, laster besokoa eramatera eraman zuen. Hiru gol sartu ditu Athleticekin eta, hain zuzen ere, kamiseta zuri-gorriarekin jokatu zuen bere ehungarren partida FC Bartzelonaren aurka izan zen, 2022ko urrian.

Berriozarren jaioa eta Juan Carlos Unzue futbolari ohiaren iloba, CA Osasunan hezi zen. 18 urte zituela iritsi zen Bartzelonara, eta 12 urtez talde blaugranan aritu ondoren, bere erreferenteetako bat bihurtu zen, guztira 348 partida jokatuz. Lau Liga eta bost Kopa altxatzea lortu zuen.

Athletic Clubek eskerrak eman nahi dizkio jokalariari urte hauetan guztietan izan duen profesionaltasunagatik, erresilientziagatik eta gure erakundearen aldeko konpromisoagatik, eta onena opa dio bere etorkizun pertsonal eta profesionalean.

Eskerrik asko Unzu!