“Talde honek anbizio handia du”
Javi Lergak konfiantza helarazi du CD Teneriferen aurkako estreinaldiaren atarikoan eta "gure zaleen aurrean etxean hastea pizgarri garrantzitsua" dela uste du
Javi Lerga Athletic Clubeko entrenatzaileak lehen partida ofiziala zuzenduko du larunbat honetan, 12:00etan, CD Teneriferen aurka. Tafallarrak bere iritziak eman ditu denboraldi berriko estreinekoaren atarikoan, Jon Uriarte presidenteak taldeari zorte ona opa dion goizean. "Ilusio handiz ekiten diot hasierari, Kluba, instalazioak eta zaleak ezagutzen nituen. Une berezia da jokalarientzat eta niretzat. Pizgarri garrantzitsua da etxean hastea, ikusleak alde ditugula, oso prestatuta gaude partidarako eta denboraldi osorako", esan du lehen hitzartzean.
Taldearekin gogotsu dagoela sumatzen da: "Pozik gaude, dugun materia prima oso ona da, anbizio handiko talde gaztea. Klubaren balioekin oso lerrokatuta dago. Arazo dezente izan ditugu lesioekin, baina horrela ikusi dugu zer nolako talentua duen taldeak ezbeharrari aurre egiteko. Bigarren taldeko futbolariak sakonago ezagutu ditugu, eta oso gogoanizango ditugu denboraldian zehar".
Lan handia falta da, jakina: "Elkar ezagutzen ari gara, lan handia egin dugu eta denbora eman dugu nolako taldea izan nahi dugun ikusten: baloia gurea izatea nahi dugu, aurkaria estutzeko iniziatibarekin. Ditugun jokalariak oso dinamikoak eta oso moldakorrak dira".
CD Tenerife beti da zaila: "Partida oso arrokatsua espero dugu, oso bizia. Tenerifek oso batera defendatzen du, oso ondo amaitu duen taldea da. Baja garrantzitsuak izan dituzte eta fitxaketekin ordezkatu dituzte. Lehen partida beti kostatzen da. Zaleei garaipena eskaini behar diegu".
"Lehen helburua bihar hiru puntuak lortzea da. Hortik aurrera, oso kontziente gara taldeak egin duenaz, ez gara ezerekin konformatzen. Egunerokotasunak markatuko gaitu", adierazi du erronkei buruz hitz egin duenean. Bere ustez, "Clara Pinedoren baja garrantzitsua da, baina jokalari askok bete dezakete bere hutsunea". Albiste ontzat jotzen du jada Amezaga, Azkona eta Oguiza berreskuratzea. Eta Bibiren itzulera fitxaketa handia dela uste du.
Erlazionatutako aurkariak

Erlazionatutako partidak
Athletic Club - CD Tenerife

