"Konfiantza eta pausa emango diguten emaitzak lortu behar ditugu"

Bartzelonara joateko ordu gutxi falta direnean, Javi Lerga komunikabideen aurrean agertu da Lezaman. Bibiane bihar 12:00etan RCD Espanyolen aurka jokatuko den partidarako prest egongo da, baina Zugastik eta Pinedok erizaindegian jarraituko dute, Estefaz gain.

Jon Uriarte presidenteak atzo esandakoari eta Athleticek lortu nahi dituen helburuei buruz galdetuta, Tafallako teknikariak Klubeko agintari nagusiak atzo emandako babesa eskertu du. "Babes handia sentitzen dugu bai talde teknikoan bai jokalarietan", esan du. Lergak esan du taldeak potentzial handia duela: "Ez da espero zen hasiera izan.", esan du. F Ligako lehen hiru jardunaldi hauetan puntu bakarra lortu arren, entrenatzaileak egoera testuinguruan kokatu nahi du: "Hiru jardunaldi bakarrik jokatu ditugu eta mundu bat geratzen da aurretik. Talde honek potentzial handia du eta badakigu aurrera egingo dugula".
 

Aurrerapausoa, beharrezkoa

Plantilla hain gaztea izateak zalantza sortzen du egoera konplexuagoetan nola erreakzionatuko duten jakiteko. Nafarrak "martxa behartuan" aurrerapausoa eman eta hazi behar dutela esan du, eta zuzentzen duen taldea "maila lehiakorrean eta anbizio handiarekin egina" dagoela berretsi du. "Kontua da konfiantza ematen diguten emaitzekin topo egitea", gehitu du. 

Bihar Dani Jarque Kirol Hirian RCD Espanyol aurrean izango dute, lehoiek bezala, oraindik lehen garaipena lortu ez duen taldea. Athleticeko entrenatzaileak esan duenez, "oso ondo lehiatzen da eta Sara Monforte partida bakoitzera egokitzeko gai da. Beti prestatzen du zerbait desberdina. Aurkariaz haratago, uste dut gakoa gugan dagoela. A Coruñan gauza asko egin genituen partida aurrera ateratzeko eta horretan jarri behar dugu fokua".