"Iragan denboraldiko inertzia positiboa bilatu behar dugu"

Ernesto Valverde Athletic Clubeko entrenatzaileak agerraldia egin du lehoiek San Mamesen Girona FC taldearen aurka 1-1 berdindu ostean. Partida maldan gora jarri zen laster, baina bere mutilek, behintzat, puntu bat berreskuratu zuten: "Askotan atsedenaldian aldaketak egiten dituzunean, zerbait suspertzea eta mugitzea bilatzen duzu. Horrela jarraituz gero, galdu egingo genuela ikusten nuen. Gure jokoa erraz aurreikusi zitekeen eta txarra zen lehen zatian. Erreakzionatu beharra genuen. Neurketa iraultzeko abaguneak izan ditugu, baina ez da posible izan".

Teknikari zuri-gorriarentzat, bere taldearen zailtasunik handiena ordenatutako defentsak gainditzea da: "Arerioak oso atzean sartu eta espazioak ixten dizkigutenean, zailtasunak izaten ditugu. Beste batzuetan gertatu zaigu. Nagusitasun hori beti gol bihurtu nahi duzu eta ez gara lortzen ari. Iragan denboraldiko inertzia positiboa bilatu behar dugu".

Jokabide orokorrari dagokionez, Valverdek analisi hau egin du: "Iaz gol gutxien jaso zituen taldea izan ginen. Horretan ongi moldatzen gara. Nahiko arriskatu gara etekinik lortu gabe. Bigarren zatian hobeto aritu gara irabazteko aukerekin, eta hori da kontua. Denok borrokatzen dugu erasoan arriskua sortzeko eta defentsan babestuta egoteko. Badakit asko eskatzen diedala jokalariei eta zaila dela. Golik ez sartzeko boladari amaiera eman diogu gutxienez, pena izan da sartu ez direnak, baina tematzen jarraitu behar dugu".