Athletic Club bere metodologiarekin Japoniara heldu da

Athletic Club bere ereduaren funtsa esportatzen duen prestakuntza proiektu batekin sartu da Japonian: Athletic Club Training Camp Japan 2026. Ekimen horri esker, Japoniako haurrek bertatik bertara ezagutu ahal izango dute Athletic munduan bakarra bihurtu duen metodologia, 125 urte baino gehiagoko historiarekin eta tokiko talentuaren formakuntzan oinarritutako nortasunarekin.

Athletic Club Training Camp Japan 2026 hiru egoitzatan (Chiba, Kanagawa eta Osaka hirietan) garatuko da datorren urteko urtarrileko lehen egunetan. Chiban hasiko da, urtarrilaren 6 eta 7an; Kanagawan, 9 eta 10ean; eta azken egoitza Osakan izango da, urtarrilaren 11 eta 12an.
Entrenamenduko bi jardunaldi bizi horietan, parte-hartzaileek Athletic Clubeko teknikariek gidatutako saioak izango dituzte, ikaskuntza gidatuan, banakako garapenean eta talde-lanean oinarritutako ikuspegiarekin. Esperientzia horren bidez, jokalari gazteek munduko elitean lehiatzen den erakunde bateko kide izateak zer esan nahi duen bizi izango dute, beren filosofiari leial eutsiz.

Aukera aprobetxatu nahi duten Training Camp-eko futbolariek Athletic Club Stage programan parte hartu ahal izango dute astebetez Lezamako instalazioetan. Bertan, harrobiko jokalari zuri-gorriek egunero egiten duten bezala entrenatu ahal izango dute, Nico Williams, Unai Simon edo Iñaki Williams bezalako jokalariak hazi ziren goi errendimenduko ingurune batean.

Horrela, Athletic Club Training Camp Japan 2026, Wakatake Group tokiko partnerraren eskutik, Japonian jarduera hauetan eskarmentu handia duena, aukera paregabea eskaintzen du Athletic esperientzia Japoniatik irten gabe bizitzeko eta, aldi berean, kulturen arteko harremanak estutzeko futbolaren, balioen eta kirolarekiko grinaren bitartez.