"Gure energia guztia bihar hiru puntuak lortzeko helburuan ditugu"

Partida berria Lezaman bihar (16:30ean), egutegiko 10. jardunaldia. Pasaden abuztuan EH Kopan penaltietan armaginek irabazi zuten norgehiagokaren ostean, Athletic Clubek eta SD Eibarrek elkarren aurka jokatuko dute ligan. Derbia ezinbestekoa da zuri-gorrientzat, ez baitute garaipenik lortu ikasturte hasiera honetan. Horregatik, Javi Lergaren taldearen dinamika zalantzan jarri da biharko hitzorduaren aurreko prentsaurrekoan.

"Animoz jota gaude, baina egoera iraultzeko eta aurrera egiteko gogoz ere bagaude. Ez da egoera erraza inorentzat. Dinamikek hau dute. Bihar aukera bikaina dugu derbian". Gainera,momentu honetan Klubaren konfiantza eta babesa sentitzen duela adierazi du. "Ez gaude nahiko genukeen lekuan, baina dena biharko neurketan fokua izatea eta energia guztia hiru puntuak lortzean dutela" gaineratu zuen.

"Partidak pixka bat gehiago astindu behar ditugu"

Lergaren hitzetan, Lezaman larunbat arratsaldean jokatuko den derbian "atzean eroso sentitzen dira, jende asko pilatzen dituzte eta oso biziak dira. Badakigu norgehiagokaren pisua eramango dugula. Bloke baxuan dauden taldeen aurrean pazientzia izan behar dugu, baina batez ere gogorrago ekin area barruan".

Egia da Athleticek, garaipenik lortu ez duen arren, gol gutxi jasotzen dituen taldea dela, baina Tafallakoak honako hau azpimarratu du "azken herenean jarri behar dugu arreta, ez baikara gola aurkitzen ari, eta nolabaiteko bertikaltasuna falta zaigu. Partidaren kontrola dugu fase askotan, baina baloia azkarrago eraman behar dugu azken herenera". Ildo horretan, Clara Pinedoren azken norgehiagokaetako berragerpenaren berri ona nabarmendu du, sorbaldako lesio baten ondorioz bi hilabetez jokatu gabe egon dena.

Azkenik, Javi Lergak adierazi du taldeak, oso gazte, maila emozionalean nabaritu dezakeela garaipen falta. "Egoera horretan zaudenean, dena jartzen duzu zalantzan. Zelaiaren erasoko eremuan ez gara nahiko genukeen bezain bertikal eta sakonak izaten ari. Partidak pixka bat astindu behar ditugu eta aurkariaren atea gehiago begiratu".