Euskal Lionsek bere Movember zuri-gorria errepikatuko du

Bere urteroko hitzorduari leial eutsiz, Euskal Lions peñak bere Movember zuri-gorri partikularra martxan jarri du azaroan. Kasu honetan, igandean, hilaren 9an, Oviedoren aurkako partidaren atarian eta peñaren egoitzan izango da, Luis Briñas kaleko Campeon Tabernan, San Mames parean. Goizeko 11:00etatik aurrera, bizarra mozteaz eta biboteak txukuntzeaz arduratuko dira bizargin profesionalak. Dohaintzak biltzeaz gain, Euskal Lionsek konpromisoa hartu du bibotea uzten duen boluntario bakoitzeko 5 euro emateko.

Movember 2003an jaio zen Melbournen, Australiako lagun talde batek urteko azken-aurreko hilabetean bibotea uztea erabaki zuenean, gizonezkoen osasunarekin lotutako kausa sozialak eta ongintzazkoak babesteko metodo ikusgarri gisa. Batez ere prostata eta barrabiletako gaixotasunetan jartzen zuten arreta, baina denborarekin arkua handitu egin da, osasun mentala eta suizidioaren prebentzioa azpimarratuz.