Athleticek arrakastaz ospatu du NFLren lehen festa handia San Mamesen

Athletic Cluben eta NFLren arteko lehen lankidetzak 450 zale bildu zituen San Mamesen, Esker On Egunean antolatutako Watch Party batean. Futbol amerikarreko bi partiden emanaldiaz gain, zozketak, opariak, zuzeneko elkarrizketak eta giro bikaina nagusitu ziren. Aforo osoa beteta, sartu ezinik geratu zen jende asko; Athletic Clubek eskaera hori kontuan hartuko du etorkizunean aukera zabaldu eta esperientzia jende gehiagorentzat handitzeko.

Athletic Clubeko presidenteorde Jon Ruigomezek eta NFL Espainiako zuzendari nagusi Rafa de los Santosek ongietorria eman zieten bertaratutakoei, bi erakundeen arteko lankidetza sendotuz. NFLko ordezkaritza osatzeko, han izan ziren, halaber, Gerardo Chapa —NFL Espainiako zuzendari nagusia— eta Luis Cardoso —Miami Dolphins-en Country Managerra—; biek ala biek publikoarekin batera gozatu zuten San Mameseko egun bereziaz.

Athletic Cluben aldetik, Aitor Paredes —kirol honen jarraitzaile sutsua— bertan izan zen gainontzeko zaleekin festa partekatzen, eta Jose Ángel Iribar, Klubeko mitoa, ere agertu zen ekitaldian.

Festaren aurkezpena Javier Gomezek eta Julen Axpek egin zuten. Jai giroan, Athletic Clubeko opariak zozketatu ziren, baita Chicago Bears eta Miami Dolphins taldeetako hainbat produktu ere, publikoak oso ondo baloratu zituenak.

Eskaintza gastronomikoak ukitu berezia eman zion festari, euskal pintxo tipikoak eta Estatu Batuetako tipikoak uztartuz: indioilar errea ahabi-kremarekin egindako ogitarteko txikiak, pulled pork eta cheddarrarekin egindako mini burgerrak eta patata kurruskariarekin egindako mini hot doga.