"Asko gustatzen zait nire taldeak duen espiritua"

Ernesto Valverde Athletic Clubeko entrenatzailea komunikabideen aurrean agertu da, lehoiek Levante UD taldeari bisita egin aurretik, aste oso bizi bati hasiera emango diona, elkarren segidako hiru lehia zorrotzekin: "Gehiago merezi izan genuen partida gogor batetik gatoz. Ezin izan genuen Pragan irabazi eta orain LaLigan jarri behar dugu arreta hiru partida zail jarraian jokatuta. Ondo hasi nahi dugu. Jakina, lehenengoa garrantzitsua da, azken jardunaldian galdu genuelako eta batu egin behar dugulako. Txapelketako tarte jakinetan puntuak joan zaizkigu eta orain berreskuratu egin behar ditugu".

Hala ere, teknikari zuri-gorriak bertuteak azpimarratu ditu: "Asko gustatzen zait nire taldeak nola jokatzen duen, neurketa bakoitzari nola ekiten dion eta duen espiritua. Egia da batzuetan zailtasun ezberdinak izaten ditugula. Ez gara asmatzen ari aurreko urtean agian egiten genuen bezainbeste. Uste dut denbora eta tematzeko kontua dela. Gola egiten duten jokalariak ditugu. Aukerak pilatzen dituzunean eta huts egiten duzunean, zerbait falta zaizu, baina hori ez daukazunean, askoz gehiago falta zaizu. Ildo horretan abaguneak sortzen jarraitu eta zehatzagoak izan behar dugu. Gauza batzuk aldatu nahi ditugu hobetzeko, baina badaude beste asko indartsu egiten gaituztenak eta mantendu nahi ditugunak. Ez dugu erabateko aldaketarik egin behar. Taldea orokorrean ondo ikusten dut eta gure asmoa aukera bakoitza aprobetxatzea da".

Azkenik, talde granotari dagokionez, Valverdek honako analisia egin du: "Emaitza hobeak lortzen ari dira etxetik kanpo, bere zelaian egutegi zaila izan baitute. Talde txukuna da, Julian Caleroren guztiak bezala, ondo konprimitzen eta gainditzen zaila delako. Berdintasun handia dago eta denok dugu beharra. Norgehiagokak ez dira erabakitzen gol-distantzia handiengatik, zerbait arraroa gertatzen ez bada".