Athletic Club - Deportivo Abanca

Athletic Clubek udako bigarren lagunartekoan garaipena lortu du Deportivo Abancaren aurka. Lehoiek gogor aurre egin behar izan zioten talde galiziarri, baina Javi Lergaren taldea hiru bider aurreratu zen markagailuan denboraldiaurreko lehen partida irabazteko (3-2).

Lehen zatiak oso abagune gutxi izan zituen. RC Deportivoko Paula Monteaguadok izan zuen lehena, Olatz Santanari hegan eginarazi ziona. Lehen zatiaren amaieran lehoiek aurrea hartu zuten Daniela Agoteren jokaladi on baten ondoren. Oihana Aguirregomezkortak ez zuen hutsik egin ate aurrean eta  Elgoibarko harrobiko jokalariak, joan den asteburuko lagunartekoaren antzera, zuri-gorrien lehen gola egin zuen. Handik gutxira, Deporrek berdinketa erdietsi zuen, Marisak area barruan aldaratze bat jaso eta baloia sareetara bidali ostean.

Bigarren zatian Javi Lergak aldaketak egin zituen. Clara Pinedok 55. minutuan sartu zuen lehoien aldeko bigarren gola eta Barbara Latorrek, bost minutu geroago, Llaneseko zelaian berriro ere berdinketa ezarri zuen. Erritmo bikainean 90 minutuak jokatu zituen Daniela Agotek egin zuen 3-2koa, eta Pinedok norgehiagoka guztiz erabakitzeko aukera izan zuen. Ines Pereira atezainak geldiketa gogoangarria egin zion erdilari bilbotarrari.

Gauzak horrela, Athleticek denboraldiaurreko prestaketa honetako lehen garaipena erdietsi du, eta datorren astean bi partida jokatuko ditu: asteazkenean, Logroñon, Duxen aurka, eta larunbatean, Portugalgo Sportingen aurka, Lisboan.