Carlos Merinok mina sentitu du asteleheneko saioan aurreko bietan lesioa sufritu zuen toki berean, hots, ezker hankako iskiotibialetan, Sabino Padilla sendagileak baieztatu egin zuenez. «Ez dugu uste zuntz haustura izango denik. Jokalariak esaten eta sentitzen duenaren arabera abisua dela ematen du», azaldu zuen sendagileak. Asteartean aztertuko dute berriro. Alkizak «korrika egiten du, baina inolako biratzerik egin gabe. Ez dugu inolaz ere behartu gura». Izan ere, astean zehar zailtasun handiagoko ariketak egiten saiatuko da erdilaria, «bi artikulazio zauritu zituela kontuan hartuta». Carlos Garciaren kasuari dagokionez, gero eta hobeto dabilela adierazi zuen Sabino Padillak: «Lan eskerga egiten ari da barruan -gimnasioan- eta baita igeri lekuan ere». Ornoetan ebakuntza egin zioten Carlos Garciari joan den irailaren 28an, eta sei asteko epea ipini zuten sendagileek berriro korrika egin zezan, baina baliteke aste honetan bertan lasterkan hastea.
