Athleticek LaLigaren ekimenarekin bat egin du, Las Palmasen eta CD Teneriferen laguntzarekin, LaLiga Santanderren eta LaLiga SmartBanken hurrengo jardunaldian, La Palmako sumendien erupzioak kaltetutakoentzako dirua biltzeko helburuarekin. Onurak El Cabildo de La Palmarentzat izango dira, kaltetuek epe motz eta luzera dituzten beharrak asetzeko.

Ekintza hori ongintzako enkante birtual bat izango da, MatchWornShirt plataformaren bidez. Plataforma horrek esperientzia zabala du horrelako ekintza solidarioetan, eta 160 futbol klub baino gehiagorekin lan egin du Europa osoan, LaLigako 14 klub barne. Ekitaldi solidario honen helburua ahalik eta diru-bilketa handiena lortzea izango da, deitutako jokalarien kamiseta sinatuen enkantearen bidez. Lehoien kasuan, datorren urriaren 23ko Athletic-Villarreal partidako deialdian sartutako jokalarien kamiseta guztiak jarriko dira enkantean.

Kanpaina atzo, urriak 15 ostirala, hasiko da bi txapelketetako jardunaldien hasierarekin, eta UD Las Palmasek eta CD Tenerifek gaur, urriak 16 larunbata, 18:15ean jokatuko duten Kanarietako derbian izango du ikusgarritasun handiena. Enkante bakoitza partida bakoitzaren hasierako txistuarekin hasiko da, eta 20 eguneko iraupena izango du (datorren azaroaren 3ra arte). Epe horretan sentsibilizazio-, sustapen- eta hedapen-kanpaina bat egingo da, bai nazio mailan, bai nazioartean.

LaLiga Santander eta LaLiga SmartBank kluben parte-hartzea erabakigarria izan da El Cabildorako dirua biltzeko helburua handitzeko, eta ziur gaude oso lagungarriak izango direla La Palmako sumendiak kaltetutako guztientzat.