Sinestezina bada ere, izugarrizko aukera galdu du Athletic Clubek bere burua gora begira ipintzeko. Tamalez, lehen zatian egindako lan onari ez dio jarraipenik emon talde zuri-gorriak bigarrenean eta, bigarren astez, beheko postuekin distantzia handitu egiten da eta baita txikitu goikoekin ere, pausoa gura eta behar dena baino askozaz motelagoa den arren. Ezquerrok ireki du markagailua, Yestek handitu eta, hala zirudien behintzat, faltaz maisuki borobildu ere. Bigarren zatian, tamalez, Maxiren gol ona goizegi jaso dute zuri-gorriek, atzeko lerroan elkar ulertze eskasa erakutsi dute bigarrena hartzeko Milosevicen hanketatik eta epaileak berdinketa ahalbideratu egin du inondik penalti izan ez dena Asier Del Hornori leporatuz. Rogerrek hirunako hainbanaketa ezarri du markagailuan eta horrela zapuztu dira ilusio asko. Betisen kontra lortu egin beharko ditugu estutasun guztiak ahazteko beharrezkoak diren puntuak.