Superligako azken partida

Ordutegia eta egitaraua

Emakumezkoen Superligako azken partida, Athletic Club eta CD Hispalisen artekoa, hilaren 27an, domekan, jokatuko da San Mamesen 12:00etatik aurrera.

Azken partida hau San Mamesen ezartzea erabaki du Athletic Clubek, Pueblaren aurka bazkide zein zalegoak eskaini zuten erantzuna ikusita, eta baita Lezaman jokatzeak bazkide zein zaletuentzat suposa zezakeena kontuan hartuta: instalazioen gaur egungo lanak, kotxe iladak, arazoak aparkatzeko, harmailan sartzen den jende kopurua… etab.

Partida honetarako San Mameseko harmaila guztiak irekiko dira publikoarentzat. Txapelgorrien kopurua lehen talderen partidatan erabiltzen den berbera izango da. Irrati kabinak eta hedabideentzako ditugun instalazio guztiak ere zabalik egongo dira.

Salneurriak

Ohikoa den legez, bazkideek doan ikusi dezakete partida, behin txartela erakutsiz gero. Gainerako zaletuentzat 10 eurokoa izango da salneurria. Jesarleku guztiak zenbatugabekoak izango dira.

Fundación Athletic Club Fundazioari esker, eta Pueblaren aurkako lehian gertatu zen legez, 12 urte azpikoek ez dute sarrerarik ordainduko.

Txarteldegiak

Zaletuentzako txarteldegiak hilaren 24an, eguenean, 17:30etan irekiko dira, hots, lehen taldea eta Betisen arteko partida ikusteko ordutegi berberarekin.

Partida honetan bazkideen kopurua handia izango delakoan, eta euren interesak babesteko asmoz, sarrera kopuru mugatua salgai ipiniko duela jakinarazi gura du Athletic Clubek. Beraz, erregutzen diogu ikuslegoari sarrera aurrez aurretik erostea, partidaren egunean agortuak izatea baliteke-eta.

Hedabideak

San Mamesera sartzeko ohiko txartelak erabili beharko dituzte hedabideen ordezkariek.

Aste honetan martitzenean, eguaztenean, eguenean eta barikuan entrenatuko da emakumezkoen taldea. Ohiko den legez, jokalariekin hitz egiteko hitzordua eguenean, hilaren 24an, izango da, zehazki 18:15etan Lezaman.

Hortik kanpo, eta hedabideen eskaerei jarraituaz, adierazpenak egingo dituzte Fermin Palomar, emakumezko taldearen presidenteak; Ana Reka, zuzendaritza batzakoak, eta Iñigo Juaristik, entrenatzaileak. Hitzorduak lotzeko, Komunikazio Kabinetearen bitartez egin beharko duzue.

Garbiketa

Athletic Club-Betis partida jokatu eta 14 orduetara soilik jokatuko da emakumezkoen partida. Beraz, garbiketa operazio berezia antolatu du Athletic Clubek, San Mamesen gau osoa lan egingo duena, futbol zelaia bera eta harmailak behar den bezala egon daitezen.

Horretarako San Mameseko argindarra piztuta egongo da eten barik eta, bestalde, Betisen aurkako partidan sortuko den zaborra jasotzeko zerbitzu berezia lotu da Bilboko Udalarekin.