Aurrerapauso galanta Athletic Clubek Gasteizen emandakoa, Deportivo Alaves 2 eta 4 mendean hartu ostean. Partida polita, jokoan zein markagailuan aukera eta alternatiba asko izan duena azken finean. Etxekoek jo eta su atera dira, jaitsiera postuetatik alde egiteko gurari dagokion jarrera erakutsiz. Alavesen lehen erasoak gainditu eta gero, Yesteren gola heldu da eta horrekin batera zuri-gorrien minuturik oneank lehen zatian. Tamalez, arreta faltak eragin du arabarren gol biak (Magnok eta Astudillok) bi minututan iristea eta atsedenaldia arte iparra galdu dute lehoiek. Bigarren zatian lasaitasun osoz ekin diote norgehiagokari zuri-urdinek, baina Athletic Cluben lehen erasoan Urzaizek egin du buruz binako berdinketa. Hor amaitu da Alaves, eta are gehiago Magnok bigarren txartel gorria ikusi duenean. Ondoren, Etxeberriak beste bi gol lortu ditu, bigarrena zoragarria bere osotasunean, eta hamahiru daramatza jada. Zazpi jardunaldi darama taldeak partidarik galdu gabe eta azken hiru bidaietan, 12 gol egin ditu.
Eguna borobiltzeko Bilbao Athleticek Bigarren A Mailarako igoera fasea jokatzeko txartela eskuratu du eta Baskoniak gauza bera egin du Hirugarren Mailako txapelketa eskuratuz eta Bigarren B Mailarako igoera faserako txartela eskuratuz. Aurrekoa gutxi balitz, kadeteek 1-0 menderatu dute Real Madril eta ekainean jokatuko den espainiar Estatuko azken fasea jokatzeko sailkatu dira.