Azken Gotorlekua: Athletic Clubaren benetako futbola

Duela urte batzuk Milango «Kirolen liburu-denda»ra joan nintzen, dudarik gabe kirolari buruzko liburuak aurkitzeko egokiena, eta Athletic Clubi buruzko libururik ba ote zuten galdetu nuen. Ezetz erantzun zidaten.

Ezinezkoa iruditu zitzaidan askotan Bilboko Clubari buruzko artikuluak idatzi dituzten Italiako kirol kazetariek artikulu horietarako oso noizean behin idatzitako orrialde batzuk besterik erabili ez izana, askotan zehazgabeak zirenak.

Urte batzuk eta hilabete asko bila eta lanean pasa ondoren, hutsune hori bete izana espero dut. III. milurtekoaren futbolean, Bosman legearen futbolean, presidente-diktadoreena, diru-jainkoaren futbola, eta, Italian eta beste herrialde batzuetan, eskandaluena, ezin zitekeen isilik egon eta ezin zen aipatu gabe utzi futbol erromantikoaren eta lurraldean sustraitukoaren defentsako azken gotorlekua: Athletic Cluba.

Euskal Herrian eta Espainian asko hitz egin da Klubari buruz, noski, baina, hala ere, libururik berriena 1998koa da, Borman epaia eman eta 2 urtera besterik ez ( ondorio tamalgarriak ebaluatzeko epe laburregia); gainera, liburu guztiak «barruko» ikuspegitik idatzi ziren, beste errealitate batzuekin parekotasunik bilatu gabe, eta, batzuetan, zergatik ez?, objektibotasun eskasarekin, «bihotzak hala aginduta».

Nire asmoa, lehenik, Athleticen historia eguneratuagoa idaztea zen; bigarren, errealitate zuri-gorriarekin harremanetan bizi ez diren irakurleei zuzendutako liburua idaztea; hirugarren, klubaren ezaugarri guztiak aztertuko zituen liburua idaztea, bere bakartasuna frogatzeko eta Athleticek bakartasun hori zergatik eta zertarako defendatu nahi duen azaltzea.

Nire esperientzia falta eta akatsak gorabehera, emaitza hirukoitza lortu izana espero dut.
Ez dago dudarik merkatuan dagoen Athletici buruzko libururik eguneratuena dela; izan ere, kluba sortu zenetik 2006ko urria arteko gertaerak jasotzen ditu.
Horrez gain, liburu praktikoa da, beraz, Athletici buruz gutxi edo ezer ez dakitenek panorama historikoa, kirolekoa eta sozial osoa aurkituko dute bertan.
Klubaren bakartasuna frogatzeari eskainitako orrialdeak, azken finean, lanaren zati konstante eta zabala dira.

Ez dira falta mundu zuri-gorriarekin lotura estua duten pertsonaia garrantzitsuen ekarpenak (jokalari ohiak, zaleak, kazetariak) eta Athleticek futbol modernoan duen paper garrantzitsuari buruzko kazetari italiarren iritziak, baita Nicola Nucci-k (Leones Italianos Peñako bazkide den kazetaria) egindako aparatu estatistikoa, Euskal Herriari buruzko tresna historikoa eta bibliografia aberatsa ere.

Simone Bertelegni
Leones Italianos Peñako presidentea