Bernardo Requena, Lezaman
Kluba

Bernardo Requena, Lezaman

Bernardo Requena, indarreko prestakuntza fisikoaren arloan lehen taldeko organigraman laguntzaile moduan parte hartuko duenak, Lezamako…

Athletic Club
Athletic Club
2008ko eka. 11a

Bernardo Requena, indarreko prestakuntza fisikoaren arloan lehen taldeko organigraman laguntzaile moduan parte hartuko duenak, Lezamako instalazioak ezagutu ditu Josean Lekue Zerbitzu Medikoen arduradunaren eskutik. Bertako arduradunak, gainerako partaideak eta sendatze prozesua segitzen duten Gorka Iraizoz eta Pablo Orbaiz ere agurtu ditu.

Requena (Granada, 77-08-28) futbolera itzuli da “batik bat Athletic leku ezberdina delako, kalitatea eta lana lehentasuna dutelako, edozein profesionalek bere lana gustora egiteko baldintza guztiak dituelako. Gainera instalazioak asko gustatu zaizkit, batik bat kokalekuarengatik, ezinobea baita lan ona egiteko. Pertsonalki ere lan giro ona dakusat”.

Haren lanari buruz zerau dio Requenak: “Indar eta abiadurarekin harremana duen guztia da, Javier Reyesen lanarekin koordinatuta jakina, baina lan ere egingo dut Zerbitzu Medikoekin batera lesioak ekiditzeko plangintzan”.

Azken urteotan futbolerako prestakuntza fisikoan gertatu diren aldaketez jabetu da: “Egia da asko aldatu dela. Nekearen aurrean erresistentzia da osagarri garrantzitsua futbolean, baina ekintza erabakiorretan abiadura da emaitza markatzen duena eta futbolean gero eta gauza gehiago egiten da tarte labur batetan. Indarraz ari garenean ez dugu gimnasioan egiten den lanarekin derrigorrez lotu behar, lan mistoa egingo dugu, gimnasioan eta baita zelaian ere. Abantaila daukagu, barruko pabilioian egin dezakegu eta.

Requenaren ustez “lan garrantzitsua egin daiteke klub honetan, profesionalen kalitatea kontuan hartuta eta lanerako dauden bitartekoak kontuan hartuta. Gainera, behe mailako taldeetan lan eremu zabala dago, asko egiteke eta hobetzeko”.

Granadako Unibertsitatean lizentziatua, Estoniako Tartuko Unibertsitatean osatu zuen doktoregoa, tesia irakurri eta eurekin ari da egiten hainbat ikerkuntza lan. Ikasitakoa Sevillan ipini zituen martxan 2004/2005 (Joaquin Caparros entrenatzailea zela) eta 2005/2006 denboraldietan (Juande Ramos entrenatzailea zela). Hortik ikerkuntzara berriro ere, nahiz eta banan-banako lana egin duen Sergio Ramos eta Julio Baptista bezalako jokalariekin.

Lehen taldeko teknikariak, zerbitzu medikoak, Orbaiz, Iraizoz eta Ocio (Sevillan denboraldi bat egon zen harekin) eta Julen Masach ezagutzen ditu eta baita bi urtez koordinatzaile nagusia izan zen Luis Fradua ere, Requenak berak bi urtez egin baitzituen Luis Fraduaren ordezko lanak unibertsitatean, hots, gurean egon zen bitartean.

+
Informazio gehigarria