Garaipen zaila Extremaduran

Extremadurak 2 Athleticek 3


Emakumezkoen taldeak lan eskerga egin behar izan du gogorra izan den lehian. Hasteko soropila, zerbait esatearren, etsai bihurtu da, norgehiagoka belar artifizialeko lehen belaunaldiko zelaian jokatu da eta porlanezkoa baitzirudien. Gauzak horrela Extremaduraren joku zuzena nagusi izan da eta, ondorioz, bigarren jokaldien borrokaldiek zailtasun asko sortu dute gure jokalariengan. Aurrekoa gutxi balitz, epaileak ez du behar bezalako irizpiderik izan txartel gorriak erakusteko eta erdibidean geratu da hainbat jokaldi eztabaidagarrietan.
Lorena kanpora bidaltzeaz gain, txartel gorria ahaztu bide du epaileak Erikari penaltia egin diotenean atezainaren aurrean bakar bakarrik zela edota Laurak Arrate kolpatu duenean.
Azken finean Athletic Club nagusi izan da, baina ez du jakin partida itxi markagailuan aurrea bitan hartu duen arren. Halaber, eta zelaian zegoen egoera nahasia dela eta, Arrate eta Tzibi ordezkatu ditu Juaristik, txartel festen harrapatuak ez izateko. Garaipenaren ostean laugarren dago Athletic Club, Espanyol eta Rayoren lidergotik zazpi puntura, baina partida bat gutxiagoz.

Athletic Clubek honako hamaikako aurkeztu du Extremaduraren aurka: Ainhoa, Vanessa, Itsaso, Marta M., Tzibi, Orueta, Joana, Ibarra, Erika, Eba eta Paula. Aulkian Andere, I.Murua, Gangoiti, A.Olabarrieta, Garazi, Nerea Perez eta Yasmin izan dira.

Extremadura: Emmeline, Gema, Cristiane, Azahara, Bea, Piedad, Cacau, Laura, Estefa, Lorena eta Maria Angeles. Aulkian Esther, Sandra, Maria Gomez, Estela, Vicky eta Aroha izan dira.

Epailea Gomez Navarrete izan da, eta Garcia Maqueda eta Garzon Llorente, laguntzaileak.

12:04 Hasi da partida

(12′) 0-1. GOOOOOOOOOLA! Erikak
(43′) 1-1. Cristianek

13:07 Hasi da bigarren zatia

(46′) Aldaketa Athletic Cluben: Gangoiti Ebaren ordez.
(50′) Txartel horia Laurari
(52′) 1-2. GOOOOOOOOOOLA! Vanessak.
(55′) Aldaketa Athletic Cluben: I.Murua Paularen ordez.
(58′) 2-2. Lorenak
(62′) Txartel horia Tzibiri.
(63′) Aldaketa Athletic Cluben: A.Olabarrieta Oruetaren ordez.
(63′) Aldaketa Athletic Cluben: Garazi Tzibiren ordez.
(68′) Txartel horia Lorenari.
(69′) 2-3. GOOOOOOOOOOLA! Vanessak, penaltiz.
(74′) Txartel gorria Lorenari.
(75′) Txartel horia Garaziri.