Ernesto Valverde, Athletic Cluben historian partida gehien zuzendu dituen teknikaria (306), gaur arratsaldean aurkeztuko dute San Mamesen (18:00etan), presidente berriaren, Jon Uriarteren, lehen ekitaldi publikoan.

Valverdek bere hirugarren etapa izango du zuri-gorrien aulkian. Bere arrakastek ibilbide eredugarria bermatzen dute: sei denboralditan Europarako bost sailkapen lortu ditu, horietako bat Txapeldunen Ligarako, eta titulurik gabeko 31 urteko lehortea hautsi zuen 2015ean lortu zuen Superkopa garaikurrarekin, Camp Noun altxatutakoa, 5-1eko emaitza globalarekin. Europan partida gehien zuzendu dituen Athleticeko teknikaria da (42).

Valverde aulkietara itzuliko da FC Bartzelonan (2017-2020) lau garaikur irabazi ondoren: bi Liga, Kopa bat eta Superkopa bat.

Entrenatzaile zuri-gorri berriak sei denboraldiz (1990-96) jantzi zuen Athleticen elastikoa, eta 50 gol sartu zituen. Lezaman hezi zen entrenatzaile gisa, bi urtez kadeteak, bat jubenilak eta beste batez Bilbao Athletic zuzenduz, 2003-04 denboraldian lehen taldera igo zuten arte. Valverdek 140 garaipen lortu ditu teknikari zuri-gorri gisa, eta Superkopako txapelduna izateaz gain, Kopako txapeldunordea eta Europa Ligako final-laurdenetara ere iritsi zen (2015-16), Sevilla FC-ren aurka penaltietan galdu ondoren.

Athletic Club eta FC Bartzelonaz gain, Valverdek RCD Espanyol (2006-07 UEFAko txapeldunorde), Olympiacos (hiru liga titulu eta Kopako bi etapa), Villareal CF eta Valencia CF zuzendu ditu.

Bitxikeria gisa, gure taldea bi zelaietan entrenatu duen Athletic Clubeko teknikari bakarra da, San Mames zaharrean eta oraingoan, RC Celta-ren aurkako liga partida batean berarekin batera zelai berriko aulkia inauguratu baitzen.