Bihurri pare bat zinema-jaialdia zabaltzeko

Thinking Football Festival Zinema Dokumental eta Futbolaren Jaialdiak, Athletic Club Fundazioak eta BBK Aretoak antolatuta, ekitaldia zabaltzen duen “Los rebeldes del fútbol” filmeko protagonistetako pare baten presentziaz egingo du inaugurazioa. Emanaldian, Gilles Rof filmeko zuzendariaz gain, beraien engaiamendu sozialagatik aski ezagunak diren Predrag Pašić eta Rachid Mekhloufi futbolariak ere egongo dira.

Jugoslaviarekin nazioartean ibilitako futbolari ohia dugu Predrag Pašić, Balkanetako Gerra garaian Sarajevotik ihesi egin beharrean, futbolari profesional gehienek egin zuten moduan, bertan geratu eta haurrentzako etnia anitzeko futbol-eskola martxan jarri zuena. Bubamara izena ezarri zion eskola hark oraindik ere zabalik segitzen du, adiskidetze eta bizikidetasunaren aldeko lana eginez.

Rachid Mekhloufi, bere aldetik, 1958ko Munduko Txapelketarako deialdian sartu zen Frantziako futbol selekzioaren jokalari handienetarikoa zen. Halere, Argeliako gerra denboran kontzentraziotik ihes egin zuen, herri horren independentzia nahia munduan zehar aldarrikatzen zuen Nazio Askapenerako Fronteko ofiziala ez zen selekzioarekin aritzeko. Saint Etienne talde frantziarrak sekula ere izan duen golegilerik trebeena da Mekhloufi, eta 1982ko Munduko Txapelketan Argeliako hautatzailea izan zen Xixongo neurketa famatuaren eraginez kanporatua gelditu arte, hau da, Alemania eta Austriako selekzioak beraien arteko emaitza ustez adostu zutelako.

“Los rebeldes del fútbol”, apirilaren 29 astelehenean proiektatuko da 19.00etan, BBK Aretoan. Tokia bete arte sarrera librea da. Filma ikusi ondoren, bildutakoek zuzendariarekin eta protagonistekin solasaldian egoteko aukera izango dute.