“San Mameseko babesak piztu egiten zaitu”

Dani Garciak prentsa agerraldia egin du gaur San Mamesen Levanteren aurka jokatuko duten partidaz hitz egiteko. Aurkaria “denboraldi bikaina” egiten ari dela aipatu du erdilariak eta garaipena lortzeko zalegoaren babesa “oso garrantzitsua” izango dela nabarmendu du: “Iaz ikusi genuen, lehenengo itzulitik bigarrenera emandako aldaketan, San Mames festa giroa bizi zenean. Azken hamar minutuetan zaleen animoek partidara lotu eta berriz pizten zaituzte. Batuta egoteak gotorleku bihurtzen du San Mames. Partidetako azken minutuetan emandako babesak taldeari ondo datorkion bultzada ematen digu”, adierazi du.

Talde zuri-gorriak azken jardunaldietan izan duen joerari ere erreparatu dio: “Partidetan ondo sartzeak asko ematen digu, Espanyolen edo Realaren aurka, esaterako. Oso ondo etortzen zaizkigu hasiera indartsuak eta markagailuan aurretik jartzeak”.

Levanteren aurkako partidari dagokionez, Dani Garciak hiru puntuak lortzeko gakoak eman ditu: “Defentsan fidagarriak izatea eta euren kontraerasorik ez onartzea. Kontuz ibili behar dugu Morales, Bardhi edo Kanpaina bezalako jokalariekin”.

Bere egoera pertsonalaz galdetuta, denboraldi honetan minutu guztiak jokatu dituen erdilariak adierazi du entrenamendu bakoitzera “hamaikakoan bere lekua irabazteko ideiarekin” joaten dela, eta “iaz baino konfiantza handiagoarekin” dagoela. “Aurten txartel gutxiago erakutsi dizkidate, eta protestatu ere gutxiagoegiten dut, entrenatzaileak eskatzen didana ondo eginez”, aitortu du jokalariak.