Irakurketak Gabarraren lehoiak batu ditu

Bi liga, kopa bat eta superkopa bat irabazi zituzten urte bikainak berpiztu dituen anaitasunezko bazkari baten ondoren, heroi zuri-gorri haietako hamaika jokalari ohi Foru Liburutegiko Irakurketa Klubean elkartu dira Alfonso del Riok idatzitako liburuaz hitz egiteko. Eleberria, “Euriaren hiria” izenekoa, neurri batean 80ko hamarkadaren hasierako Bilbon girotuta dago, zehazki 1983an, orduko uholde ikaragarriak Athletic Club mitiko batekin elkartu zirenean. Azken batean, aukera ezin hobea zen Fundazioak irakurketaren Athletic Club bat antolatzeko, talde gogoangarri haren kondairekin.

Carlos Melendez, Santi Urkiaga, Iñigo “Rocky” Liceranzu, Andoni Goikoetxea, Txato Nuñez, Miguel De Andres, Ismael Urtubi, Miguel Sola, Patxi Salinas, Juanjo Elgezabal eta Patxi Bolaños izan dira ekitaldian. Juanjo Baños kazetariak moderatu du solasaldia eta Alfonso del Rio eleberriaren egilea izan du alboan. Oroitarrian, gabarraz gain, oso gogoan dagoen partidu bat, liburuan eta solasaldian, Lech Poznanen aurkako Europako kanporaketa, Andoni Goikoetxearen hitzetan, “Jokatu genuen partidurik onena”.

Santos taldeko bat, Atlas taldeko bat eta Barça taldeko beste bat

Bestalde, Jose Roberto Torero, Juan Pablo Villalobos eta Miqui Otero idazleek Katedralean hitz egin zuten Letren eta Futbolaren bigarren egunean. Futbola kultura ezberdinetatik etorritako pertsonak batzen dituen hizkuntza den ziurtasunarekin, hiru gonbidatuek idazle gisa izandako esperientzia ezberdinen inguruan hitz egin zuten alde batetik, eta zale moduan bestetik.

Jose Roberto Torero brasildarrak azaldu duenez, bere haurtzaroan ikusitako lehen partidak baldintzatu zuen jarraitzaile gisa izandako bizitza. Pelek Santosekin jokatu zuen azken partida izan zen eta baita bere aita negarrez ikusi zuen lehen aldia ere atsedenaldia baino pixka bat lehenago munduko jokalaririk onena ordezkatu zutenean. Villalobos mexikarrak Guadalajarako Atlaseko zale izaera definitu zuen hitz hauekin: “Atlasekoa naiz, irabazi arren”, eta horrek argi erakusten du zaletu baten eta bere taldearen arteko loturak porrotetan garaipenetan baino indar handiagoa duela. Bestalde, Miqui Oterok, Barçaren zaleak, elkarrizketa moderatu zuen eta beste pasadizo askoren artean, Alcides Edgardo Ghiggia uruguaiarrak, Uruguaik Brasilen aurka irabazi zuen 1950eko Munduko Txapelketan esandako esaldia ekarri zuen gogora: “Hiru pertsonak bakarrik isildu dute Maracana: aita Santuak, Sinatrak eta nik”.