Athleticen haurrak Irakurketa Klubean

Garrantzitsuena ez da bakarrik zuk proposatzen duzuna, baizik eta zure helburua lortzeko nor duzun inguruan. Gure filosofiatik hain gertu dagoen esaldi batek Athletic Cluben berezko Irakurketa saio bat merezi zuen. Are gehiago, esaldi hori futbolari eta adiskidetasunari buruzko liburu batean agertzen bada eta haren egilea, Jose Roberto Torero, Letrak eta Futbola zikloaren X. edizioan parte hartzen ari bada. Galdu ezineko aukera bat Fundazioarentzat. Horrexegatik, gaur arratsaldean, Aliron eta San Mames haur taldeetako 30 bat mutil Mikel San Joserekin eta Jose Roberto Torero idazle brasildarrarekin elkartu dira “Futbolaren istorio bat” liburuaren inguruan hitz egiteko. Andoni Ayarza, Kirol Zuzendari Laguntzailea, Iker Goñi batzarkidea, eta Txema Añibarro, Oskar Alkorta, Cefe Ruiz eta Unai Rodriguez entrenatzaileak ere bertan izan dira, Bilboko Foru Liburutegian.

Liburua irakurrita zuten bertaratutako denek eta gaurko topaketak pasarteak komentatzeko, emozioak partekatzeko eta irakurketa gure harrobiko futbolarien prestakuntzaren parte izan dadin sustatzeko balio izan du.

Gertuko begirada

Letrak eta Futbola zikloaren erdialdera iritsita, Aritz Gorrotxategi, Martin Etxebarria eta Jon Kortazar euskal idazleen txanda izan da gaurkoa. Bere obrak abiapuntutzat hartuta, literaturaren eta futbolaren arteko harremana euskal kulturaren ikuspegitik landu dute. Ez dira falta izan Eduardo Galeanoren “El fútbol a sol y sombra” liburuaren, Euskal Selekzioaren, Athletic eta Realaren arteko lehiaren inguruko komentarioak edota futbolak beste idazleen obretan izan duen garrantziaren inguruko erreferentziak.