Lasai ez egoteko urte hasiera
Lasai ez egoteko urte hasiera
Levante eta Valentzia urtarrilean iritsiko dira Lezamara, eta otsailean Erreginaren Koparen hasiera eta derbia Realaren aurka ekarriko dituzte
Primera Iberdrolaren egutegiak lehen itzulia bete du, Athletic Club sailkapeneko bosgarren postuan utzita, Deportivo Abanca baino puntu bat gutxiagoz. Talde zuri-gorriak ilusioz ekingo dio txapelketaren erdiari, sailkapenean gorenera iristen saiatzeko. Gainera, otsailean Erreginaren Kopa hasiko da, beraz, datozen bi hilabeteetarako egutegia oso zorrotza izango da.
Bigarren itzuliko lehen norgehiagokak aurkari oso zaila ekarriko du Lezamara: UD Levante. Levantetarrak hirugarrenak dira eta Atletico Madrilek egun duen postua lortzea dute helburu Women ‘s Champions League-n parte hartzeko. Maria Pryren taldeak 2-0 irabazi zien lehoi emei ligako lehen jardunaldian eta zuri-gorriak baino 6 puntu gehiago ditu.
Urteko lehen irteera Madril CFFren aurka izango da, eta ondoren Valentzia Lezamara iritsiko da Coruñara joan aurretik, lehoi emeek baino puntu bat gehiago duen Deportivoren aurka jokatzeko.
Bigarren itzuliko hirugarren jardunaldiaren ondoren hasiko da 2020ko Erreginaren Kopa. Partida bakarrera izango da, eta zozketa hutsez. Lehen kanporaketa final-zortzirenetakoa izango da, otsailaren 11n edo 12an jokatuko dena.
Aste horretan bertan, Athletic Clubek Real Sociedad hartuko du etxean derbiaren bueltan, eta Sevillara joango da gero, Real Betisen aurka jokatzeko. Zuri-gorri taldeak Kopako lehen kanporaketa gaindituz gero final-laurdenetako partida jokatuko luke otsailaren 25ean eta 26an. Bi hilabete izango dira ligan gogotik lan egiteko eta K.O. txapelketako finalerdietarako sailkatzen saiatzeko.