Iñaki Williams: “Nahiko nuke hau dena normaltasunera bizkor itzuliko balitz”

Iñaki Williamsek zaletuek eta hedabideek Athletic Clubeko sare sozialen bidez helarazitako galdereei #Etxetik erantzun die. Lezaman entrenatzeko ezintasunaren aurrean egindako entrenamenduei buruz hitz egin du: “Entrenatzera joan ezin izateak gehiago zaindu behar izatera behartzen gaitu. Prestatzaile fisikoen eta Toscana, gure dietistaren plana jarraitzen ari gara, itzultzen garenean pisu egokian iristen saiatzeko”. Jokalari guztiek banakako lan-plana jaso dutela nabarmendu du, “Goitik behera betetzen duguna. Konfiantza osoa dugu gure mediku eta prestatzaile fisikoengan “.

Asko dira Errege Kopako finalaz galdetu dutenak eta aurrelariak ez du ezkutatu jokatzeko eta irabazteko gogoa. “Kopako finala irabaztearekin egiten dut amets, ez dago pentsamendu hori etortzen ez zaidan egunik. Hori da Bilbo osoak eta athleticzale orok amesten duena. Jokatzeko irrikitan nago, Kopa etxera ekarri eta denok batera Gabarra gainean ospatzea espero dut “. Gainera, zaleriak partida honetan duen garrantzia azpimarratu nahi izan du: “Ez dut Errege Kopako final bat harmailetan ikuslerik gabe ulertzen. Egun polita izango da Euskal Herriarentzat eta denok nahi dugu gure jendea bertan “.

Bere alde pertsonalenari buruz, eskertuta sentitzen dela goi mailako futbolari gisa duen statusagatik nabarmendu du, baina batez ere, “Harro nago jendea nirekin identifikatzen delako eta pertsona on gisa ikusten nauelako, bizitzan asko ahalegindu den pertsona apal gisa”.

Azkenik, Iñakik ahalegina eskertu nahi izan du “zaintzen ari zareten guztioi, kalera ateratzen den jende guztiari. Eskerrik asko, eskerrik asko bihotzez. Nahiago nuke dena normaltasunera bizkor itzuliko balitz, eta denok honetaz dakitenen aholkuei jarraitzea eskatzen dut: #GeldituEtxean “.