77ko europar finalaurreko hura

1977ko apirilaren 6an, asteazkena, duela 43 urte, eta 10.000 zale zuri-gorriren aurrean, Athletic Club taldeak Molenbeek auzoko (Brusela) Racing White Daring (RWD) taldearen aurka jokatu zuen UEFAko Kopako finalaurrekoaren joaneko partida. Banako berdinketa izan zen emaitza, eta San Mamesen jokatutako bueltakoarena zeroko berdinketa; horrekin eta golen balio bikoitzarekin, nahikoa izango zen Juventusen aurkako finalerako.

Koldo Izaguirre entrenatzailearen agindupean, lehoiek honako taldeak utzi berri zituzten atzean: hungariar klubik zaharrena, Ujpest Dozsa (1885); FC Basel suitzarra; Milan, Gianni Rivera, eta Fabio Capello (Urrezko Baloia) jokatzen ari zirela; eta Cruyff eta Neeskens-en FC Barcelona, final laurdenetan. Racing White talde belgikarra aurreko edozein baino talde apalagoa zen, baina Holandako Feyenoord ahaltsua menderatu berri zuen laurdenetan, 70eko hamarkadaren hasieran Europako eta UEFAko txapeldun izandakoa; beraz, nahiz eta Athletic faborito moduan egon, partida nahiko berdinduta egongo zela aurreikusten zen.

Sasoi hartako kroniken arabera, zale zuri-gorrien kopurua oso handia izan zen. Euskaditik joandako 5.000 pertsona inguru eta Belgikan bertan bizi ziren beste horrenbeste bertaratu ziren Edmon Machtens zelaira. 31.000 ikuslerentzako tokia zuen zelaiak, eta 25.000 inguru izan ziren egun hartan. Athleticek baja garrantzitsuak izan zituen: Irureta, Villar eta Alexanco. Honakoa izan zen taldea: Iribar, Lasa, Gisasola, Goikoetxea, Escalza, Garay, Oñaederra, Rojo II, Churruca (Dani, 83’), Amorrortu (Carlos, 78’) eta Rojo I. Hasiera-hasieratik, zuri-gorriek beren kalitatea erakutsi zuten, nahiz eta belgikarrak ere oso fin ibili. Txetxu Rojo, Amorrortu eta Churrucak osatutako hirukotearen jokoaren bidez, Athletic 25. minutuan aurreratu zen, azken horrek Lasari erdialdera pasatako burukada bati esker. Iribarrek 52. minutuko penaltia gelditu zuen, eta bukatzeko bi minutu falta zirela, Bilbotarrek atzealdean egindako akats baten ondorioz, berdinduta geratu zen partida, eta bi aste beranduago San Mamesen gertatuko zenaren mende geratu zen emaitza.

Historia luzeko taldea

Gaur egun, Racing White taldea ahaztuta dago. 1895ean dauka jatorria, eta hainbat fusioren ondorioz sortutakoa da. 70eko hamarkadan nahiko ospetsua izan zen, batez ere 1974/75 denboraldian Belgikako liga irabazi zuelako. Athleticen aurkako europar finalaurrekoa nazioarteko lorpenik garrantzitsua izan zen haientzat, eta, ordutik, beheranzko ibilbide bat hasi zuen, 2002an guztiz desagertu arte.

Hala ere, Bruselako Molenbeek auzoan –95.000 biztanle, horien % 30a atzerritarrak- oso errotuta zegoen, eta 2015ean birsortu egin zen Racing White Daring (RWD) Molenbeek izenarekin, Amateur 1. mailan militatuz. Momentuz, hala ere, ez du aurrekoan lortutako adinako arrakastarik izan.