“Hemendik aurrera beste zale bat bezela gozatuko dut”

San Mameseko toki paregabean, Aritz Aduriz oso hunkituta agertu da espero zen prentsaurrekoan, asteazkenean futbola behin betiko utziko zuela iragarri ostean. Aduriz bere emaztearekin eta alabekin atera da zelaira, bere taldekide eta lehen taldeko teknikari guztiek egin dioten korridoretik, eta eskerrak eman dizkie familiari, klubari eta zaleei bere ibilbide osoan erakutsitako maitasunagatik.

“Ezin nuen gaurko agur hau imajinatu, ezta gertatu zaidan guztia ere, txikitan Athletic osoaren kamiseta behin ere jantzi ahal izatea ez nuelako pentsatu”, azpimarratu du aurrelariak. “Txundituta nago egun hauetan jaso dudan guztiarekin. Ez da triste egoteko unea, zoriontsu egoteko unea baizik, beti gustatu zaidana egin dudalako eta asko gozatu dudalako egiten. Horregatik iritsi naiz honaino”.

Aduriz oso argia izan da denboraldia amaitu baino lehen erretiratzeko erabakia hartzera eraman duten arazo fisikoei dagokienez: “Aspalditik nenbilen minen aurka borrokan, eta gutxi gorabehera jasan nezakeen eta taldeari zerbait lagundu, baina gero eta gutxiago. Baina konfinamendu honen ondoren behin betikoa izan da eta ez da borroka orekatua izan, balantza laster joan baita aldakaren aldera. Gorputz orok bere mugak ditu, are gehiago kirolari profesional batentzat. Ez zegoen ezer egiterik. Une honetan, taldea hobea da ni gabe”.

Egungo osasun egoera dela eta harmailen maitasunik ez izan arren, Aritz nahikoa saritua sentitzen da hainbeste denboralditan athleticzaleek emandako babesagatik: “Ez dut jendearen omenaldia izateko beharrik sentitzen, Katedralak hainbeste eman dit… Niretzat, igandero omenaldi bat jasotzea bezala izan da”. Era berean, Kopako balizko ospakizun batean bere protagonismoa kendu nahi izan du: “Gabarran hutsune bat? Ez dut behar. Garrantzitsuena da atera ahal izatea eta Athleticeko zale guztiek horretaz gozatzea. Eta ni beste bat bezala, hori izango naizelako hemendik aurrera, desiratutako Kopa hori ospatzea gustatuko litzaidakeen beste zale bat”.

Iragana, oraina eta etorkizunaren erabateko erreferentzia zuri-gorria den Aritz Adurizek hitz hauekin zehaztu du Athletic espiritua: “Hemen daukagun giza taldea ikaragarria da, eta horrek egiten gaitu ezberdin. Mundu guztiaren aurka lehiatzen ari den koadrila bat bezalakoa da. Eta horren esanahia ulertzen duen hainbeste jende uzten dut hemen, ez dela beharrezkoa nik ezer esatea hurrengo belaunaldiei ezin hobeto transmitituko dietelako”.

Badoa mito bat, “jakin zuen onena egiten beti saiatu zen norbait” bezala bakarrik gogoratua izan nahi duena.