Urteurrena: Amaia Olabarrieta eta Saioa Gonzalezi omenaldia
Emakumezkoena

Urteurrena: Amaia Olabarrieta eta Saioa Gonzalezi omenaldia

Gaur, baina orain dela lau urte, Amaia Olabarrieta eta Saioa Gonzalez jokalariek erretiroa hartu zuten

Urteurrena: Amaia Olabarrieta eta Saioa Gonzalezi omenaldia
Urteurrena: Amaia Olabarrieta eta Saioa Gonzalezi omenaldia
2020ko mai. 22a

Atzo, Athleticeko emakumezkoen taldearen historian oso garrantzitsuak izan ziren hiru jokalariren agurra gogoratu genuen, eta gaur, arrastoa ere utzi zuten bi jokalariren txanda da, belauneko lesio batek erretiratzera behartu zituenak. Amaia Olabarrieta eta Saioa Gonzalez lehoi ohiez ari gara; izan ere, gaurko egun batean, duela lau urte, taldekide eta zaleen maitasuna jaso zuten Lezaman. 27. jardunaldiko norgehiagokaren atarikoetan, lehoiek Oiartzun bisitari zutela, Amaia eta Saioa omendu zituzten ekitaldi xume batean. Gero, Joseba Aguirreren neskek 2-0 irabazi zioten talde gipuzkoarrari, ondoz ondoko sei garaipeneko bolada onari eutsiz. Bi aste geroago, zuri-gorriak ligako txapeldun geeratu ziren.

Amaia Olabarrietak Athleticen historian partida gehien jokatu dituzten jokalarien ‘Top-10’ zerrenda ixten du (232). 2004ko ekainaren 4an egin zuen debuta eta 13 denboralditan zehar kolore zuri-gorriak jantzi zituen. 2014ko martxoan, Valentziaren aurkako partida batean, erdilariak eskuin belauneko aurreko lotailu gurutzatua hautsi zuen. Hura izan zen lezamarrak lehoi gisa jokatu zuen azken partida.

Saioa Gonzalezen kasuan, ezkerreko belauna izan zen (lehenago ebakuntza egin zioten belaun horretan) aurreko lotailu gurutzatuaren haustura jasan zuena, 2013ko apirilean Atletico Madrilen aurkako partidan, Cerro del Espinon. Atzelariak 2010eko irailaren 19an egin zuen debuta Athleticekin L’Estartit taldean aritu ondoren, eta sei denboralditan 70 partida jokatu zituen.

2016ko maiatzean klubak euren ibilbidea, dedikazioa eta ahaleginagatik omenaldi beroa eskaini nahi izan zien. Azken urteak lesioa sendatzeko borrokan ez ziren errazak izan. Arratsalde hartan, taldekideen besarkadek suspertu egin zituzten klub zuri-gorrian jarraitzen duten bi jokalariak. Amaia emakumezkoen Haur Mailako entrenatzailea da eta Saioa, berriz, lehen talde zuri-gorriaren delegatua.