Garitano: “Jokalari guztiak buru-belarri izan behar ditugu”

Gaizka Garitano Athleticeko entrenatzaileak agerraldia egin du gaur eguerdian Lezamako prentsa aretoan, komunikabideen aurrean, modu telematikoan. Beste denboraldi baterako berritzea sinatu eta egun batzuetara, “Klubak gauzak oso argi esan dizkit, komunikazioa oso arina izan da eta ez da inolako arazorik egon“, gaineratu du.

Hainbat gai jorratu diren prentsaurreko luze batean, LaLigaren itzulera izan da gai ohikoena. “Ezin dugu hasierako balorazioa egin, berria da guztiontzat, baina hobeto moldatzen denak abantaila aterako du. Zaleak faltan botako ditugu, asko bultzatzen gaitu; baina ohitu egin behar gara, horrela lehiatu beharko dugu”.

Era berean, modu ofizialean lehiatzen hasi aurretik lagunarteko partidak jokatzerik ez izatea zaila dela esan du Garitanok: “Sentsazio onak izan ditzakezu entrenamenduetan, baina ez ditugu 90 minutu pilatuko, eta hori simulatzea oso zaila da entrenamendu batean. Ez dugu denbora askorik izan denok batera lan egiteko, ezta hamaikakoen arteko ariketak egiteko ere”. Hala ere, “hiru egunean behin jokatzeak” kezkatzen du gehien. “Dezente baldintzatzen gaitu. Zama, presio eta higadura handiko taldea gara. Badira hain fisikoak ez diren beste batzuk, gutxiago nabarmenduko dutenak. Jokalari guztiak buru-belarri izan behar ditugu, edozein unetan haien beharra izango dugulako”.

Ligako lehen aurkari den Atletico Madrili buruz, “Championsen sartzeko borrokan ari den aurkari indartsua” dela esan du, eta gaineratu duenez, “Liverpooli bi partida irabaztetik dator, munduko talde bakar batek ere ez lukeena gauza izango. Baina aurreko denboraldian irabazi genion”.

Etorkizunean pentsatuz, Garitanok belaunaldien arteko aldaketa saihestezinaz hausnartu du: “Gazteek gaur egun 30 urte baino gehiago dituzten eta taldearen maila guztietan erreferente diren jokalari hauen kirol maila eman beharko dute, eta, horrez gain, giza arloan asko kezkatu beharko dute, jokalari beterano horiek ikaragarriak baitira giza mailan. Gazteek jakin behar dute paregabeko klub batean daudela eta jokaera modua ere desberdina dela”.

Nola ez, Aritz Adurizen izena ere aipatu da: “Besarkatu egin behar izan dut eta berarekin ‘borrokatu’. Oso harreman bizia eta bikaina izan da. Galera oso handia da, azken urteetan golak sartzearen ardura hartu du”.