Pia Wunderlich, 1.FFC Frankfurteko harribitxia

Athleticek 2020 One Club Woman saria 1.FFC Frankfurteko Pia Wunderlich (Bad Berleburg, 1975) jokalari ohiari ematea erabaki du. Erdilari germaniarrak bere ibilbide profesional osoa Alemaniako 1.FFC Frankfurt talde ospetsuan egin zuen, 1993an gaztaroan debutatu zuenetik 2009an erretiratu zen arte. Arrakastaz betetako hamasei denboraldi osatu zituen, emakumezkoen futbolaren historiako erreferentzia handienetako bat bihurtuz.

Munduko txapeldun geratu zen Alemaniako selekzioarekin 2003an, Europan hiru aldiz txapeldun 1997, 2001 eta 2005ean eta brontzezko domina lortu zuen 2004ko Joko Olinpikoetan. Pia Wunderlich nazioarte mailan ibili zen 12 urtez jarraian (1993-2005), 102 partida jokatuz eta 21 gol sartuz. Bere palmaresa 1.FFC Frankfurtekin bikaina da, UEFA Women’s Champions Leagueko hiru txapelketa irabazi baititu, Europako txapelketa nagusia, 2001-02, 2005-06 eta 2007-08 denboraldietan. Era berean, Pia Wunderlichek bere klubarekin sei Bundesliga irabazi zituen, Alemaniako Lehen Maila, 1999, 2001, 2002, 2003, 2005 eta 2007an, baita 7 DFB-Pokal ere, Kopako txapelketa, 1999, 2000, 2001, 2002, 2003, 2007 eta 2008an.

7 zenbakidun dortsala bizkarrean zuela, alemaniar jokalari ohia bere abiadura eta erregaterako zuen abileziagatik nabarmentzen zen. Zelai erdi osoa hartzea dominatzen zuen, eta bere altuerari esker (1,73 zm) aireko jokoan ere nabarmentzen zen. 2008an, ASD CF Bardolino talde italiarraren aurka Women’s Champions Leagueko finalerdia jokatzen ari zela bere eskuineko belaunean izandako lesio larri batek, sei hilabete baino gehiago jokatu gabe eragin zion, eta gero erretiroa hartu zuen.

Pia Wunderlich, Malin Moström Umeå IK taldeko jokalari ohi suediarraren ondorengoa da One Club Woman sarian, Athletic Clubek ematen duen saririk garrantzitsuena. Bitxia bada ere, Pia Wunderlichek eta Malin Moströmek Estatu Batuetan jokatu zen 2003ko Munduko Kopako finalean jokatu zuten bata bestearen aurka. Arauzko denboran bana berdindu ondoren, luzapenean sartutako urrezko golari esker nagusitu zen Alemaniako selekzioa. Bi One Club Woman hauek ere behin baino gehiagotan gurutzatu ziren Women’s Champions Leaguen, hiru finaletan jokatuz. Horietako bitan alemaniarrak nagusitu ziren, 2002 eta 2008an, eta batean, 2004an, suediarrak. 1.FFC Frankfurt taldea UEFA Women’s Champions League txapelketan garaipen gehien lortu duen bigarrena da, lau titulurekin, Lyonek (Olympique Lyonnais Féminin) baino bi gutxiago.