CD Badajoz, Bilbao Athleticen lehen aurkaria 2. Mailara bidean

CD Badajoz izango da Bilbao Athleticen aurkaria Bigarren Mailara igotzeko playoffetako lehen kanporaketan. Uztailaren 18an, larunbatean, Algeciraseko Nuevo Mirador estadioan jokatuko da kanporaketa, partida bakarrera.

“Talde sendoa da, fisiko handia du. Normalean 4-4-2 jokatzen dute, eta bere aurrealdeko bikotea nabarmentzen da, Aquino eta Santamariarekin, biak joko eta konexio handiarekin. Partida zaila izango da, baina ondo bagaude edozein talderi irabaz diezaiokegu”, esan du Joseba Etxeberria Bilbao Athleticeko entrenatzaileak.

Bilbao Athleticen puntu berdinekin (49), Badajoz IV. taldeko hirugarren sailkatua izan da fase erregularrean, Errege Kopan egindako lan bikaina eginda gainera. Extremadurako taldeak SD Eibar kanporatu zuen final-hamaseirenetan 3 eta 1 irabazita, eta Granadaren aurka final-zortzirenetan gauza bera egiteko zorian egon zen, luzapenaren bigarren zatian galduta.

Gorka Santamaria (Bilbao Athleticek azken aldiz lortu zuen Bigarren Mailarako igoerako beste protagonistetako bat) da taldeko goleatzaile nagusia, 10 tantorekin

Bi taldeen arteko aurrekariak
Bilbao Athletic eta CD Badajoz hamar aldiz aritu dira elkarren aurka historian zehar. Horietako zortzi hain zuzen ere Bigarren Mailan eman ziren, playoff hauetan lortu nahi duten kategorian. Beste bi norgehiagokak 1966-67 denboraldiko Hirugarren Mailako promozio fasekoak dira, zilarrezko kategorian postu bat lortzeko helburuarekin jokatu zutena (oraindik ez zen 2.B maila existitzen). Azkenean, Extremadurako taldeak lortu zuen postua, etxean 2 eta 0 irabazi eta Bilboko 2 eta 1 garaipena alferrikakoa eginez.