San Josek eta Beñatek ez dute Athleticen jarraituko

Athletic Clubek gaur jakinarazi die Mikel San Jose eta Beñat Etxebarria jokalariei denboraldi honen amaieran harreman profesionala amaitzeko erabakia. San Mameseko ikusleen aurrean jokalariek merezi duten agurra egitea ezinezkoa denez, Athleticek ekintza berezi bat antolatu du etxeko azken partidarako, Leganesen aurka, bien omenaldi gisa.

Mikel San Jose bi etapa ezberdinetan aritu da Lezaman, gazte mailan Txantreatik heldu ostean eta profesional bezala. Athletic Clubek Liverpooletik fitxatu zuen jokalari nafarra 2009an, eta bere lehenengo partidan, Europa ligan, 3-0 irabazi zion Vienako Austriari. Lehoi bezala 397 partida jokatu ditu hamaika denboralditan, guztira 37 gol sartuz, kopuru zoragarria erdilari edo euskarri bezala aritu dela kontuan hartuta. Superkopako txapelduna izan zen Bartzelonaren aurka, joaneko partidan zelai erditik gol bikaina sartuta, titulua lortzeko bidearen hasiera izan zen gola.

Bestalde, Beñat Etxebarriak ibilbide luzea egin du zuri-gorri moduan, bi etapa desberdinetan. Lehenengo, hamarkada bat eman zuen zuri-gorri bezala beheko mailetan hasita. Alebin mailan hasi zen eta 2006an egin zuen debuta Sadarren. Ondoren, Conquense eta Betisetik igaro ondoren, Athletic Clubeko lehen taldera itzuli zen, zortzi denboraldi jokatuz eta 242 partida. Hamaika gol sartu ditu, gehienak zuzeneko jaurtiketetan. San Jose bezala, Superkopako txapelduna izan zen Ernesto Valverderen aginduetara.

Mikeli eta Beñati eskerrak eman nahi dizkiegu urte guzti hauetan klubaren eta taldekideen alde egindako lan eta arduragatik, eta denboraldi berezi honetan zuri-gorriz jantzita gelditzen zaien jaurdunaldiengatik. Bizitza pertsonalean eta arlo profesionalean zorte onena opa diegu.