“Jar dezakegun talderik onena aterako dugu”

Gaizka Garitanok telematikoki erantzun zien hedabideen galderei Lezamako instalazioetatik, bihar Granadaren aurka jokatu baino lehen (igandea. 21:00). Europan sartzeko aukerarik ez izan arren, Deriokoak dena emango dutela azpimarratu du.

Azken partida honetarako taldearen asmoei dagokienez, zuri-gorrien artean honakoa adierazi zuen: “Partida ahalik eta ondoen prestatu dugu. Bagenekien ez zela erraza izango lehen sei postuetan sartzea. Saiatu gara, baina ez dugu lortu. Bihar irabazten saiatu behar dugu, sailkapenean ahalik eta ondoen geratzeko. Guk bihar asko dugu jokoan: ekonomikoki garrantzitsua da klubarentzat. Irabazteko jokatuko dugu, beti egin dugun bezala “.

Talde andaluzaren aurka zelairatuko duen hamaikakoari dagokionez, ez du zalantzarik: “Jar dezakegun talde onena aterako dugu. Kamiseta honek eskatzen duen profesionaltasunarekin jokatu behar dugu”.

Herrenka iristen diren jokalariei buruz, baikor agertu da: “Yuri, Yeray eta Capa ondo daude. Gaurko entrenamenduan nola dauden ikusi behar dugu. Asmoa Jokin (Ezkieta) gurekin etortzea da, Bilbao Athleticen jokatu ostean “.