undefined

“Hobeto goaz Eibarrera Granadara baino”

“Hobeto goaz Eibarrera Granadara baino”

Garitanoren ustez, “taldea Granadara baino egoera hobean iritsiko da Eibarrera. 2. jardunaldiko atsedenaldiak Liga hasierara justu iritsi ziren jokalariei erritmoa emateko aukera eman digu”

Gaizka Garitanok telematikoki erantzun die komunikabideei Lezamako instalazioetatik, Ipuruan Eibarren aurka jokatuko duten partidaren atarikoan (igandea, 14:00etan). Entrenatzaile zuri-gorriak ezin izango ditu Yeray eta Nolaskoain zelairatu, arazo fisikoengatik. Garitanok 23 lehoi eramango ditu Eibarrera denboraldiko lehen hiru puntuen bila: “Fisikoki hobeto gaude orain. 2. jardunaldiko atsedenaldiari esker denboraldi-aurrea luzatu ahal izan dugu, eta erritmo bizia eman diegu oso justu iritsi ziren jokalariei“.

Biharko norgehiagokari dagokionez, Derioko entrenatzaileak “kontrako zelaian jokatu nahi duten bi aurkarien arteko norgehiagoka gogorra” espero du. “Biok gogoko dugu defentsa aurreratuarekin jokatzea, eta aurkariaren zelaian baloia menderatzea lortzen duena erosoago egongo da. Badakigu tarte batzuetan asko sufrituko dugula, baina ondo lan egin dugu defentsan dituzten gabeziak ahalik eta gehien aprobetxatzeko”.

Garitanok jokalari gazteenen protagonismoa ere azpimarratu du: “Granadaren bigarren zatian ikusi zen, jokalari gazte asko izan ziren berdegunean. Oso onak dira eta garrantzitsua da pixkanaka minutuak batzea eta Lehen Mailan eskarmentua pilatzea”.

Amaitzeko, entrenatzaile zuri-gorriak ligan emaitza positiboak lortzeko beharra azpimarratu du: “Normala da galtzen dugunean jendeak gehiago eskatzea, batez ere 15 egun lehiarik gabe pasatzen dituzunean. Gauza normala da lan honetan. Irabazten badugu, jendeak hobeto hitz egingo du, eta hori izan behar da gure helburua. Lehenbailehen irabaztea “