Berenguer: “Argi neukan Athleticen jokatu nahi nuela”

Alex Berenguer modu ofizialean aurkeztu dute gaur arratsaldean Athletic Clubeko futbolari bezala. Talde zuri-gorriaren azken fitxaketak joan den igandean egin zuen debuta Mendizorrotzan, Alavesen aurkako futbol partidan. San Mameseko Jose Iragorri prentsa aretoan Rafa Alkorta kirol zuzendaria izan du lagun, eta, ondoren, Katedraleko berdegunean azaldu da lehen aldiz eslatiko zuri-gorriarekin.

“Pozgarria da kolore hauek defendatzea”, azpimarratu du Berenguerrek. “Lau egun baino ez daramatzat hemen, baina iritsi nintzenetik familia batean sentituz naiz, euretako beste bat bezala hartu naute. Oso pozik nago hemen egoteaz”.

Athleticeko jokalari berriak talde zuri-gorrira iristeko zuen nahia nabarmendu du: “Ez zitzaien batere kostatu ni konbentzitzea. Argi neukan Athleticera etorri nahi nuela. Egoera zaila da orain, baina ikusten dut nire kideek animaliek bezala entrenatzen dutela, eta aurrera egingo dugu. Oso pozik nago hemen egoteaz, eta harro nago klubak, presidenteak eta zuzendaritzak ni hemen egoteko egin duten ahalegina”.

Horrela definitu du bere burua Berenguerrek, bere balio-aniztasuna eta kaltzioan lortutako esperientzia azpimarratuz: “Beti sentitu naiz erosoago ezkerretik, baina baita eskuinetik eta puntaren atzetik ere. Gainera, karrilero edo atzeko albo batean jokatzea ere egokitu zait. Italiak Osasunak baino jokalari osoagoa egin nau. Italiako futbolak ondu egin nau”.

Alkorta: “Gauza askotan lagunduko digu”

Bestalde, Rafa Alkorta entitateko kirol zuzendaria pozik agertu da Berenguer jokalariaren etorrerarekin: “Gauza askotan lagunduko digun futbolaria dela uste dut, batez ere bere moldakortasunagatik, zenbait postutara egokitzeko aukera ematen baitio. Italiako ligan ia laurogeita hamar partida jokatu ditu eta ziur ekarpen handia emango digula. Izugarri ikusi dugu, aspalditik jarraitzen genion eta hari heldu ahal izan diogunean lotu dugu. Hasiera batean zaila izango zela uste genuen, Torinon asko eta posizio askotan jokatzen ari zelako, baina ekin diogu eta azkenean lortu ahal izan dugu”.
Alkortak taldearen egungo martxa ere aztertu du: “Ez da egia sasoi txarra iaztik datorrenik; izan ere, Ligako azken 11 partidetatik konfinamenduaren ostean, lehen zortzietan puntu asko berreskuratu genituen, baina azkenak ez ziren onak izan. Egia da, gure zalerik gabe jokatzera ohitu behar gara, guri asko laguntzen baitigu. San Mamesen partidak irabaziko ditugu berriro, baina egia da hori kostatzen ari zaigula. Kezkatuta nago, baina dauzkagun entrenatzailea eta taldea ikusita banago ere lasai. Ez dut zalantzarik aurrera aterako dugula. Bat eginda gaude eta gauzak gaizki doazenean orduan nabaritzen da gehien aldagela indartsu bat”.