Egoera iraultzeko aukera

Levantek San Mames bisitatuko du igande honetan (14: 00etan). Bi taldeek hiru puntuak batu behar dituzte -garaipen bakarra lortu dute orain arte, 3. jardunaldian biek-, eta Athleticen kasuan, Katedralean lau jardunalditan garaipenik ezagutu gabe egon ostean, hura lortzeko unea du.

San Mamesen lehoiek eta valentziarrek jokatutako ligako partidak kontuan hartuta, zuri-gorrien aldeko datuak azaltzen dira: 10 garaipen, 2 berdinketa eta 2 porrot. Partida hauetan, Athleticek 26 gol sartu eta 12 jaso ditu. Egungo jokalariei dagokienez, Iker Muniain kapitainak 3 gol sartu ditu Paco Lopezek zuzentzen duen taldearen aurka, Iñaki Williamsek bi eta Raul Garciak, Ander Capak eta Yuri Berchichek bana.

Athletic garaile atera da Levanteren aurka Laligan jokatu dituen azken hiru partidetan: 3-2 2018-19ko 30. jardunaldian, 2-1 2019-20ko 13. jardunaldian eta 1-2 ikasturte bereko 36. jardunaldian.

Aurkari berezia
Elkarren aurka partida asko jokatu ez dituzten arren (30 guztira Liga eta Kopa kontuan hartuta), zurigorriak eta valentziarrak gure Klubaren historiako une garrantzitsuetan gurutzatu dira. Levante izan zen Athletic Clubek partida ofizialean San Mames zaharrean aurrean izan zuen azken aurkaria. Partida 2013ko maiatzaren 26an jokatu zen, bisitarien aldeko emaitzarekin: 0 eta 1. Emaitza gorabehera, arratsalde hartan Athleicen historiako mugarri esanguratsua bizi izan zen San Mames zaharrean: Ligako azken partida, 100 urteko historia zuen zelai batean.

Ligako 37. jardunaldi hartatik astebetera, bi taldeen filialek Bigarren Mailara igotzeko play offeko partida jokatu zuten San Mamesen. 2013ko ekainaren 2an, Bilbao Athleticek eta Atletico Levantek bi goleko berdinketa lortu zuten Katedral zaharreko azken partida ofizialean.